Li Brîtanyayê ku yek ji welatê herî zêde mirin û pêketinên koronayê çêbûn, niha hejmara mirin û pêketinên vîrusa koronayê her diçe kêm dibe û behsa rakirina tedbîran tê kirin.
Di 24 saetên borî de, 2 hezar û 61 haletên koronayê hatine tomarkirin û hejmara pêketiyan jî gihîştiye 4 milyon û 403 hezar û 170 kesan. Herwiha di 24 saetan de 32 kesan can daye ku hejmara mirinan jî bûye 127 hezar û 417 kes.
Wezareta Tenduristiya Brîtanyayê ragihand ku di helmeta derzîkirina bo vîrusa koronayê de, heta niha derzîya koronayê li 33 milyon zêdetir kesan hatiye lêdan û nîvê hemwelatiyan zêdetir hatine derzîkirin.
Herwiha hatiye diyarkirin ku piştî lêdana derziyên AstraZeneca û Pfizerê di hemû temenan de rêjeya pêketinên Covid-19 kêm bûye û li gorî lêkolîna Zanîngeha Oxfordê jî li ser hemwelatiyên hatine derzîkirin antîkorên bihêz li dijî vîrûsê çêbûne.