Çalakîya "Nobeta Edaletî" ya keyeyê Şenyaşarî 644 rojî yo dewam kena. Keye ewro çalakîya xo de wina vat: "Dewaya ma agêra têkoşînêkê Tirkîya de edalet esto? Çîn o? Hukm xoser o? Yan girêdaye yo?”
Çalakîya Nobeta Edaletî ya keyeyê Şenyaşarî 9ê adara 2021ine de verê berê Edliyeyê Rihayî daya dest pêkerdiş roja 644ine de dewam kena. Ferît Şenyaşar û Emîne Şenyaşar ke keyeyê xo yê qezaya Pirsûsî ra ameyî verê berê edliyeyî vînayî ke wesayîtê bi plaqeyê fermî reyke bîn verê cayê ke pankartê înan ê “Edalet” ser de nuseno, ameyîne daliqnayîş par kerdê, pankart bi wesayîtê xo daliqnayî û dest bi nobete kerd.
Ferîtî, dîyar kerd ke dewaya înan de hetêk parlamenterê partîya îqtîdarî yo û hetê partiya ey bi xo zî nîno waştiş û wina vat: “La Wezîrê Karê Zereyêk ke wayîrê nê parlamenterî vejêno esto, serekkomarêk ke nê bêhuqûqî rê bêveng maneno, hetê parlamenterî gêno esto. Tirkîya de her kes zano ke dewayêke serekkomar û Wezîrê Karê Zerreyî terefgir bibo de do muhakemeyêkê adil nêro kerdiş.”
Ferîtî, dîyar kerd ke derheqê kesê ke nêweşxaneyî de qirkerdiş û sucê merdimayî kerdî de cezaya zîndanî yê muebbetî girankerde bêro waştiş zî nê kesî mîyanê komelî de gêrenê û qiseykerdişê xo wina qedêna: “La birayê mi yê kargehî waşt bipawo, nika tepişte yo. Ma heqdar ê ma do xo ver bidê û ma do verê edliye ra nêvisyê. Siba, di sibayî do parlamenterê partîya îqtîdarî yan zî namzedê înan do bêrê Riha. Şarê Rihayî do nê bêedaletî bivîno. Demo ke namzedêk ame nê cayî, do persê ewil ke şarî rê biperso bibo no bêedaletî. Ma zî do vejîyê hemverê înan. Heta ke no bêedaletî werte ra nêro wedaritiş, ma do fek têkoşînê xo ra vera nêdê.”