Merkezê Xeberan
Serekê Amerîka Donald Trumpî roja 7.10. 2019 de qerarê xo aşkere kerd, Dewleta Tirkîya rê rayîr akerd ke wa Rojavayê Kurdistanî îşgal biko.
Nê qerarê Donald Trumpî Rojavayê Kurdistanî şarê Kurd bi jenosîdêk rê rî bi bî verdayo. Aşkerayo ke Dewleta Tirkîya bi vatişê ‘xeterîya terorî’, wazena nîyet û plana xo ya dagirkerdişî û jenosîdî bitemerno. Dewleta Tirkîya, wazena Rojavayê Kurdistanî îşgal bika, uca de ca bido 3 milyon Ereban û hetêk ra zî wazena hem wazena dest rono heme qezencanê ser hem zî wazena demografîya ucayî bibedilno, yewpareyîya erdê Rojavayê Kurdistanî perçe biko û jenosîdêk biko. Dewleta Tirkîya wazena Rojavayê Kurdistanî de plana ‘Kemera Erebî’ bica biko, wa Kurdî erdê xo ser de bibê kêmnetewe.
Donald Trump beyanatê xo yê ewilî de îzeh keno ke, mesûlîya şerê vera DAIŞî erzeno milê dewleta Tirkîya ser o. No zî nîşanê soznameyêk mabênê Trûmp û Erdoganî yo. Trump bi na kerdena xo ked û bedelê şarê Kurd ê vera DAIŞî çine hesibneno û DAIŞî teslîmê dewleta terw peynî ke DAIŞ teslîmê ci bobo keno.
Trump bi qerarê xo yo ke rayîrê îşgslkerdişî Rojavayê Kurdistanî abeno û Erdoganî rê teslîmkerdişê DAIŞî ya, xetayêka pîle keno. No qerar do şarê Kurd hem jenosîdêk rê rî bi rî biverdo hem zî do bibo sebebê qetlîamanê rêxistinê terorî ê sey DAIŞî . Na xeletî xetayêka pîl a do biba sebebê ziraranê pîlan. Hem şarê herême hem zî do heme dinya zirarê ci bivînê.
Vera nê qerarê Trumpî ke fek hetkarîya Kurdan ra verdano û înan terkê qetlîaman keno, gere sîyasetmedarê Amerîka vengê xo vejî û wayîrê Rojavayê Kurdistanî vejîyê.
Heto bîn ra Twîto ke Trumpî nê çend saetanê peyînan de pare kerdo û Tirkîya tehdît keno, her çiqas bêîstîkrarîya ey nîşan dano zî, eslê xo de çîyêko hewl o. Ma wazenê û hêvî kenê ke Kongreya Emerîka nê qerarê Trumpî do îptal biko û do destur nêdo ke Dewleta Tirkîya Rojavayê Kurdistanî îşgal biko û şarê ma qetl biko.
Ma venga heme dinya danê: Şarê Kurd Rojavayê Kurdistanî de vera DAIŞî şerêko pîl da û bedelê pîlî day. Vera DAIŞî serkewtişê Kurdan bîyo sebep ke, tehlukeyê terorêkê pîlî serê heme şaranê dinya ra wedarîyo. Coka lazimo şarê dinya şarê Kurd tena nêverdê. Gere UN, Yewîya Ewrûpa, Emerîka , Rûsya û dewletê dinya ser o her kes giranîya xo rono ke wa Kurdan tena nêverdê.
Ma venga UN, Yewîya Ewrûpa, Emerîka, Rûsya û heme dewletanê dinya û dezgeyanê sivîlî ê ke hûqûqê mîyannetewî qebûl kerdê danê ke wa nêverdê Dewleta Tirkîya şarê Kurd rê jenosîd biko.
Rayverê Parlamento û Hukmatê Herêma Kurdistanî beyanat û pêvînayîşanê xo de îzek kenê ke şarê ma yê Rojavayê Kurdistanî mîyanê tehlukeyêk de yo. Tewr peynî Rêzdar Serek Mesud Barzanî pêvînayîşê xo yê
Wezîrê Teberî yê Rusya Sergey Lavrovî de eleqe antbi rewşa Rojavayê Kurdistanî ser û rûsaya ra waştbi wa Rûsya şarê Kurd tena nêverdo. La gereke Parlamento û Hukmatê Herêma Kurdistanî, heme partîyê xebatêka hîna aktîf bikê û nêverdê wa jenosîdêk virazîyo.
Aşkereyo ke vera na plane û hewesê dakirkerdiş û jenosîdê Dewleta Tirkîya, qeweto tewr pîl yewbîyayîş, îtîfaq û pîyabîyayîşê şarê ma yo. Gorê na rastî, her çî ra ver ma venga TEVDEM; PYD, ENKS û heme partîyanê Kurdan danê ke, wa heme problem û pênêkerdişê mîyanê xo bidê kiştêk û seba tesbît kerdişê siyaset, stratejî û rayêko ortax bêrê têhet.
Seba ke wa şarê ma vera nê teşebusê îşgalkerdişî helwestêka rast bigîro û seba ke pêvînayîşê derheqê Qnaûnê Bingehînî ê Sûrîyeya newîye de Kurdî beşkê heqanê xo yê netewîyan bigîrê, her çî ra ver gere Mitabaqatê Hewlêrî û Dihokî gorê şertanê ewroyî bêro ca.
Helwest û sîyasetêko netewî, demokratîk û ortax yê heme partîyanê Rojavayê Kurdistanî û ê her çar perçeyanê Kurdistanî do destegê dinya zî zêde biko û xurt biko.
Vakurê Kurdistanî de zî lazimtîya êyê xo rê îtîfaq û hemkarî, prensîb û ercê netewî, demokratîk, welatperwerî kerdê esas û bingeh esta. Kurdî û Kurdistanîyî heta ke prensîbê netewî, demokratîk yê bingehînan ser o îtifaqê xo ronêne, vera hêrîş û plananê Dewleta Tirkîya yê zaf hetî yê vera Vakur, Vaşûr û Rojavayê Kurdistanî do bêçare bê, do bê pawitiş bimano.
Ma reyna venga dewleta Tirkîya zî danê: Fek no siyaset û hewesa xo ya îşgalkerîye, şer û jenosîdî ra verade. Dewleta Tirkîya gere her çar perçeyanê Kurdistanî de zî estbîyayîş û heqanê netewî û demokratîk ê miletê Kurd qebûl biko û gorê na rastîye bi ewnîyayîşêko newe, maqûl û aştîyane rayîrê çareserîyan abiko.
Ma venga heme şaranê Tirkîya, heme hetanê demokrat ê ke şer û qetlîaman red jenê danê ke wa sîyaset û hewesa Dewleta Tirkîya ya dagirkerdişî û jenosîdê şarê Kurd rê vajê ‘ney’.
08.10.2019
Buroya Çapemenî û Têkilî ya PAKî