Bi beşdarîya endamanê meclîsî yê PAKî û temsîlkaranê teşkîlatanê PAKî, mabênê rojanê 21-22 Êlûla 2019î de, Amed de Kombîyayîşê Hîrakerdî yê Meclîsê Partîye yê PAKî virazîya û kombîyayîş bi serkewtî qedîya.
Kombîyayîşê Hîrakerdî yê Meclîsê Partîye yê PAKî de ewilî semedê kesê ke têkoşînê azadî bîyê şehîd rêz ame grewtiş.
Destpêkê kombîyayîşî de Serekê Pêroyî yê PAKî Brêz Mustafa Özçelikî derheqê prosesê sîyasî yê Kurdistan, Tirkîya û herême de û derheqê rewşa PAKî de û xebatan de malumat da.
Kombîyayîşê Hîrakerdî yê Meclîsê Partîye yê PAKî de prosesê sîyasî yê Kurdistan û Tirkîya û bîyayîşê peyînan ser o ame vindertiş. Heto bîn ra rayê xerîteya sîyasî ya PAKî ser o zî ame vindertiş û rayê xerîtaya sîyasî ya PAKî amey kifşkerdiş.
Kombîyayîş de 5 serrê peyînî yê PAKî ser o derga-derg ame vindertiş. Kombîyayîşê Hîrakerdî yê PAKî de hetê sîyasî ekonomî û diplomatîkî ra xebatê ke ameyê kerdene û merheleya peyîne ser o qme qiseykerdiş. Kombîyayîş de ame îzehkerdiş ke, her çiqas zor û zehmetî zî estbê zî, Vakûrê Kurdistanî de têkoşînê netewî, vindertişê demokrat, xeta Kurdistanî û dînamîkê esasî esas amê girewtiş û no tespît amo kerdene.
Qerarê ke amê girewtiş û tespîtê ke Kombîyayîşê Hîrakerdî yê Meclîsê Partîye yê PAKî de amê kerdiş cêr de yê:
1-Çarçeweya qîmetanê însanî û meşrû de, şarê Kurdistanî seba ke qederê xo tayîn biko, welatê xo de bi statuyêka sîyasî xo bi xo îdare biko xo ver dano, têkoşîn keno la çi heyf ke destegê şaranê dinya nêgêno. Rolê Dewletanê dinya seba qezeckerdişê statûya Vaşûrê Kurdistanî û Rojavayê Kurdistanî zaf o. la çi heyf ke dewletê dinya zaf rey menfietanê xo serê heqanê şarê ma yo mezlum û bindest gênê. Heto bîn ra şarê ma dişmenê ma mucadele keno la wexto ke şarê ma no mucadele keno û bedelanê pîlan dano dewletanê dinya ra destegêko hewl nêgêno. Şarê Kurdistanî zaf rey rîyê ‘menfietanê dewletan’ û rastê hêrişanê zulumkaranê herêmîyan yeno û tena maneno. Şarê Kurdistanî Rojhilatê Mîyanîn de temsîlklar û pawitoxê aştî û demokrasî yo. La çi heyf ke şarê ma no mucadele de tena maneno! Ma qayîlê wa heme dewletê dinya êye dewaya aştî kenî kişta şarê Kurdistanî de ca bigîrê. Çunke şarê Kurdistanî vengê hêvîye yo. Gere heme dewletê ke aştî pawenê desteg bide şarê Kurdistanî.
2-Herêma Kurdistanî de roja 25ê Êlûla 2017î de Referandumê Xoserîye virazîya. %72yê şarê ma beşdarê referandumî bi û bi %92.73 referandum de desteg da Referandumê Xoserîye. Referandumî ser ra 2 serrî vîyartî.
Kombîyayîşê Hîrakerdî yê Meslîsê Partîye yê PAKî de ma bi heme fikir, hîsîyast û zerrî ra û bi aşkere, newe ra vanê ke, ma desteg dane nê beyanê şarê xo yê demokratik û meşrû.
3-Ziwanê Dayîke estbîyayîşê yew şarî yo. Esteyê yew şarî ziwan o û dewamîya yew şarî bi ziwanê xo beno. Dewleta Tirkîya Vakûrê Kurdistanî de bi polîtîkayanê xo yê asîmîlasyonî û înkarî, nêverdaya wa Kurdkî bibo ziwanê perwerdeyî û Kurdkî (Kurmancî û Zazakî) qedexe kerda. Dewleta Tirkîya zerarêko pîl daya şarê ma. Vakûrê kurdistanî û tirkîya de qasê 25 mîlyon Kurdî estê. Gere Kurdê ma sey wazîfeyêko mîllî hetêk ra seba heqê xo yê perwerdeyî mucadele bikê, hetê ra zî seba heqê xo yê hûqûqî mucadele bikê. Gere hetêk ra zî seba musayîşê Kurdkî xebate bikê. Û firsendê ke kewtê destê înan bixebitnê. Wayîrvejyayîşê Kurdkî wayîrvejyayîşê sibarojê miletê Kurd o.
4-Tekoşînê azadî yo ke her çar parçeyanê Kurdistanî de dîyeno, mucadeleye azadî yê ma yo zî. Qezenc û serkewtişê Rojavayê Kurdistanî û Vaşûrê Kurdistanî qezenc û serkewtişê heme Kurdan ê. Pawitişê qezencê Dewleta Federe ya Herêma Kurdistanî bîya wesîleyê yewîya demokratîke û dewletbîyayîşî. Vera tehlukeyê ke vernîya şarê Rojavayê Kurdistanî de yê tedbir û hêzê xoverdayîşî pêameyîşê Duhok û Hewlerî yo. Gere no mutabaqat bibo rojane û bikewo falîyet, yaşama geçirilmesi, tek tip yönetim anlayışından vazgeçilmesidir. Gere Kurdistan de îtîfaqo demokratik bêro ca.
5-Dewletê ke şarê Kurdistanî rê serdestî kenî (Tirkîya, Îran, Iraq, Surîye), gere bizanê ke hînî nêeşkenê bi sîyasetê şîdet û înkar Kurdan îdare bikê. Senî ke vizîr nêeşkayê bi şîdet na mesela safî bikê ewro zî nêeşkenê bi şîdet û înkar Kurdan îdare bikê. Êdî na raştîye bivînêne! Çare no yo ke gere meseleyi bi rayê aştî, demokrasi û rayê sîyasetî bêrê safîkerdiş! Sîyasetê seserran nîşanê ma dayo ke, hîna zêde bi şîdet ney bi ziwanê aştî meseleyi yenê safîkerdiş. Coka ma venga dewleta Tirkîya danê ke wa derxal, bi aşkera huzurê dewletanê dinya de masayê aştî de ronişo.
6-Dewleta Tirkîya gere êdî fek sîyasetê xo yê dişmenetîya Kurdan ra verado! Seba qebûlkerdişê heqanê Kurdan gere rayê sîyasetî û demokratîk bêro ceribnayîş. Dewleta Tirkîya hetêk ra kena ke partîyanê Kurdistanî biqefilno, hetêk ra serekê beledîyeyan ê ke hetê şarî ra amê weçînayuîş wezîfe ra gêna û herinda înan de qeyûman tayin kena. dewleta Tirkîya hetêk ra bi bi bahaneya ‘eleqeyê înan bi terorî esto’ însanan kar ra erzena. Hetêk ra cezayê hepisxaneyî, hetêk ra şîdet û zuzlum. La nê çî nêeşkenê mücadeleye şarê ma asteng bikê. Dewleta Tirkîya hema meseleya Vakûrê Kurdistanî safî nêkerda û kena ke Başûr û Rojavayê Kurdistanî rê hêriş biko. Dewleta Tirkîya kena ke qezencanê Başûr û Rojavayê Kurdistanî orte ra wedaro û uca bigîro binê destê xo. La na kerdena dewleta Tirkîya çi rey sernêkewena! Dewleta Tirkîya bi pêrodayîş, hêriş û sîyasetê dagirkerî nêeşkena têkoşînê azadî yê şarê Kurdî asteng biko. Lazim o dewleta Tirkîya cade fek nê sîyasetê xo ra verado û cade partîyanê Kurdan, temsîlkaranê Kurdistanî û heme partîyanê Kurdan dir seba ke na mesela bi rayê aştî safî biko masa de ronişo.
7-Kombîyayîşê Hîrakerdî yê Meclîsê Partîye yê PAKî de PAK eşkera kena ke, semedê azadîya Tirkîya, edelet, demokrasî, heqê merdiman, azadîya fikrî û azadîya xorêxistinkerdişî, pawitişê heqanê cinîyan; Ziwanê dayîke de perwerdeyî, wedaritişê qedexeyê vernîya ziwanê Kurdî, caardişê azadî, heqê demokratîkî û netewî yê Kurdan, qedênayîşê şer û pêrodayîşî, hazira ke her het dir diyalog rono.
8-Vakûrê Kurdistanî de sîyasetê şîdetî vernîya çareserîya aştî de bîyo anteng. Dewlete nêverdena wa şar bi rayê çalakî û aştîyane vengê xo vejo. Mucadeleyê sîvîl, siyasal û demokratîk de zehmetî esta û no zî nişan dano ke dewleet na mesela de zorî vejena. Ma eşkenî bin a raştî ra vaje ke, PKK, Vakûrê Kurdistanî de bena sebeb ke dewlete hêriş biko û sîyasetê şîdetî bierzo falîyet. Gere PKK, fek çalakîyanê xo ê ke zerar danê şarê ma ra verado û derxal sîlehanê xo verado.
9-Seba ke wa şarê ma hîna zêde zerar nêvîno bireso meqsedê xo û bibo serkewte, yew hêzêkê biqaqil û realistî rê lazimtî esto. No hînî aşkera yo û na lazimtîye vejîyaya orte. PAK mîrasê Mucadeleyê 200 serran ra wayîr vejîyena. Kena ke wa no mîras bibo pîl, bireso heme şarî. Mucadeleyo demokratik gereke esasêko rast ser o bido dayene. Aye ra xurtkerdişê PAKî meseleyêka muhîm a.
10-PAK roja ronîyayîşê xo ra nata, nê esasan ser o sîyasetwê xo kena, bawer kena ke sîyaseto netewî û demokratik paradigmaya esasî ya. Êkê eşkenê bibê yew, yewîtîya xo ronê wa bikê êyê ke nêeşkenê wa mîyanê xo de îtîfaq bikê. Wa mîyanê dîyalogî de bê û yewbînan rê dişmenetîye nêkê.
Kombîyayîşê Hîrakerdî yê Meclîsê Partîye yê PAKî de seba ke w ana lazimtîye bêra ca, Vakûrê Kurdistanî de venga heme qadroyanê Netewî, Demokrat, Azadîwaştoxan dana ke wa wayîrê PAKî vejîyê.
11- Kombîyayîşê Hîrakerdî yê Meclîsê Partîye yê PAKî nîşan dayo ke, Vakûrê Kurdistanî de heta ewro siyasetê îtîfaqan, yewitî û sîyasetê hêzdayîşî zaf muhîm o. PAK qebûl kena ke, îtîfaqê netewî û demokratik sîyasetêko stratejik o.
12-PAK beyan kena ke, Vakûrê Kurdistanî de partîyêk estbîyayîşê Kurdan qebûl biko, statü, oheqê xo bi xo îdarekerdişî, hürmet nîşandayîşê sembolanê qîmetanê netewî, wayîrvejîyayîşê înan qebûl biko, eşkena înan dir îtîfaq rono û na mesela de xo mesul vînena.
13- Kombîyayîşê Hîrakerdî yê Meclîsê Partîye yê PAKî de dewaya qefilnayîşî ke semedê PAKî ameya akerdiş ser o amo vindertiş. Kombîyayîşê Hîrakerdî yê Meclîsê Partîye yê PAKî de vajîyayo ke, hem Qanûnê Bingehinî yê Tirkîya yê madeyê 90/4. hem hûqûqê mîyannetewî de aşkerayo ke, şarê Kurd o ke wayîrê nifusê 25 mîlyon o, miletêk o û heqê înan o xo îdarekerdişî û azadî esto. Dewaya qefilnayîşî yeno manaya înkarê Kurdistanî û înkarê şarê Kurdistanî. Kombîyayîşê Hîrakerdî yê Meclîsê Partîye yê PAKî de no qerar amo şermezarkerdiş. PAKî pawitişê xo yo ke dayo mehkema de zî vato ke, semedê safîkerdişê meseleya Kurd, bi rayîrê sîvîl, demokratik û bi rayîrê sîyasetî safî bena. Tarîxê dewleta tirkîya yo 96 serrî de hewa ewilî yew partî pawitişê xo bi Kurdkî kerd. Pak bin a hereketa xo teqdîrêk heq kerdo.
Kombîyayîşê Hîrakerdî yê Meclîsê Partîye yê PAKî de, qadroyê PAKî qerarê newî û muhîmî girewtî. Beyanê îradeyêko xurd dîyayo. Bi nê Kombîyayîşê Hîrakerdî yê Meclîsê Partîye yê PAKî hêzê ma zêde bîyo, hêvîya ma zêde bîya û ma amê merheleyêka tarîxî û newî.
26.09.2019
Meclîsê Partîye yê PAKî