Bênê ma pîya adirê Newroze semedê yewitî, hemkarî û yewrêziye webike!
Aşma adare bi rojanê şayî û keyfweşî û ancî bi rojanê xemgînî û komkiştişan tarîxê Kurdistanî de wayîrê cayêkê zaf muhîm û taybetî ya. Kurd û kurdistanî Newroze hetêkî ra sey roşanê serra newîye û ameyîşê wisarî, hetê bînî ra sey roja serehewenayîşî, xoverrodayîşî û tekoşînê semedê azadî û xoserîya Kurdistanî pîroz kenê.
Bêguman pîrozkerdişê Newroze bi no qeyde, dagîrkeranê Kurdistanî tersneno. Ê, hetêkî ra pîrozkerdişê Newroze qedexe kenê; hetêkî ra zî kenê ke, Newroze armanc û muhtewaya ci ya esasî ra dûrî bivisnê. Coka zî roja Newroze bi muhtewaya viraşte û bêmana pîroz kenê. Ê bawer kenê ke, bi no qayde do bieşkê Newroze manaya xo ya tarîxî ra dûrî bivisnê; tîn û tesîrê ey o ser hîsanê neteweyî bikişê. Coka zî ma zaf qîmetin vînenê ke miletê Kurd û kurdistanî roşanê Newroze bi ruhêko neteweyî û bi muhtewaya ci ya tarîxî pîroz bikê. Gereke Newroze, bi armancê vera dagîrkerî û zordariye û sey sembolê xoverrodayîşê neteweyî û azadîye pîroz bikê. Gere ma adirê Newroze sey beşêko muhîm yê xebate û têkoşînê vera dagirkerî, înkar û asîmîlasyonê ser miletê Kurd û kurdistanîyan webike.
Ewro Başûr û Rojavayê Kurdistanî de, miletê Kurd û şarê Kurdistanî roşanê Newroze bi hawêko azad pîroz kenê. La Bakurê Kurdistanî de, miletê Kurd hîna zî nêeşkeno bi hawakêko azad nê roşanê xo yê neteweyî pîroz biko. Îdarekarê dewlete bi qedexekerdiş û astenganê cîya bi cîyayan kenê ke pîrozkerdişê Newroze asteng bikê. La ê se kenê wa bike, dagîrkerê Kurdistanî do nêeşkê nê siyasetê xo de serbikewê; adirê Newroze do her çar hetanê Kurdistanî de webibo û berz bibo.
No proseso ke ziwanê kurdî bi jenosîdê asîmîlasyonî rê rîbirî yo de gere ma bi taybetî hewl bide ke Newroze bi kurdî pîroz bike. Ganî ma hewl bide ke nê roşanê neteweyî semedê averberdişê xebate û têkoşînê ziwanê kurdî zî bike îmkanêko muhîm. Heto bîn ra ma na roje semedê destvistişê heqanê neteweyî, komelkî û kulturî bike platformêk hempar.
Kurdistanîyê ercîyayê!
Dagîrkerê Kurdistanî êdî sey verî nêeşkenê serwerîya xo Kurdistan de biramnê. Helwesta hêzanê mîyanneteweyî, bedilyayîşê Dinya û Rojhelatê Mîyanênî de îmkanî nikayînî hetê miletê Kurd kenê û zemînê tekoşînê semedê xoserî û azadîya Kurdistanî hîra û hêzin benê. Îmkano ke Rojavayê Kurdistanî de virazîyayo nimune yo; la eynî wextî de muhîmîya yewitî, hemkarî û yewrêziya neteweyî ya miletê Kurd û kurdistanîyê nê beşê Kurdistanî de zêdêr vejyeno ver. Ganî ma baş bizane ke miletê Kurd tena bi yewitî, hemkarî û yewrêziya neteweyî do bieşko destvistişanê xo bipawo û semedê azadî û xoserîya Kurdistanî gamanê pîlan bierzo.
Bakurê Kurdistanî prosesêko zaf taybet û tehlukeyînî ra vîyareno. Na rewşe zî wezîfeyo taybet erzeno vernîya ma. Gere partî, rêxistin û hereketê neteweyî û kurdistanî ca de armanc û waştişanê acîlan yê wertaxan ser o bêrê yewca û nê warî de gamanê muhîman bierzê. No wezîfeyêko neteweyî û tarîxî yo. Gere semedê yewitî, hemkarî û yewrêziya neteweyî xebatî bêrê kerdene; destvistişanê neteweyî ser o bêro vindertene.
Biciwîyo sembolê xoverrodayîş û tekoşînê azadî û xoserîya Newroze!
Biciwîyo yewrêziya neteweya kurd û kurdistanîyan!
21ê adare 2022
– Partîya Azadîya Kurdistanî (PAK)
– Partiya Sosyalîst a Kurdistanî (PSK)
– Tevgera Demokratîk a Kurdistanî (TDK-Tevger)