PAK(Partîya Azadîya Kurdistanî) û PSK (Partîya Sosyalîst a Kurdistanî) roja 09.08.2019 de Amed de, Cemîyetê Rojnamegeran de kombîyayîşê çapemenî kerd, derheqê rojeve û bîyayîşanê peyênan de beyanatêko wertax da.
Xeylê kanalê telewîzyonan, sîyasetmedarî, ronşvîrî û endamê PAK û PSK beşdarê kombîyayîşê çapemenîyê PAK û PSK bîyî.
Kombîyayîşê çapamenî biqiseykerdişê Endamê Komîteya Rayverîyê Merkezî yê PAKî Hanifi Turanî dest pêkerd. Hanifî Turanî bikilmekî behsê armancê kombîyayîşî kerd û winava:
‘Temsîlkarê çapemenî yê rêzdarî, sîyesetmedarî û ronşvîrê ercîyayê merheba şimarê. Şima bixeyr ameyî kombîyayîşê mayê çapemenî.
Masey Partîya Azadîya Kurdistanî (PAK) û Partîya Sosyalîst a Kurdistanî (PSK) ewro seba ke vera hêriş û dagirkerîya Rojava û Vaşûrê Kurdistanî vejîyê kombîyayîşê çapemenî virazenê. Hetobîn binawesîlera, mafikr û rayê PAK û PSK yê derheqê çareserîya meseleya Kurd û Kurdistanîde, bi rayîrênê beyanatî reyna raya pêroyîrê pare bikê.
Mabeyanatêxo bizaravayê Kurmancî û Kirdkî (Zazakî) û bi Tirkî hadre kerdo. Ma do beyanatê Kirdkî(Zazakî) û Tirkîzî binuştekî vilabike. Ma do dimara bihawayo dijîtal çapemenîr êvila bikê. Nika nameyê PAK û PSK ser o rêzdar Bayram Bozyel do beyanatê ma yo wertax yê Kurmancî şimarê biwano’.
Hetkarê Serekê Pêroyîyê PSKÎ Bayram Bozyel beyanatê wertaxîyê PAK û PSK pêşkêş kerd.
No tekst zî beyanato wertax yê PAK û PSK yo:
‘’ Hêrişê dagirkerî ke qezencanê Kurdan rê benê bivindarnêne!
Miletê Kurd rastê hêrişanê stratejîkan û planê ke estbîyayîşê ey hedef gênê yeno.
Seba ke wa Kurdî serkewte nêbê, çîyêk nêkewo destê înan, Dewleta Tirkîya her cayê dinya de Kurdan rê dişmenetîye kena û hêrişê Kurdan kena.
Dewleta Tirkîya xeylê wexto ke bi bahaneyê ‘vera terorî têkoşîn’ zaf cayê Vaşûrê Kurdistanî bombebaran kena û cayê ke operasyonê eskerî tede benê de, qerekolanê neweyan virazena.
Dewleta Tirkîya seba Rojavayê Kurdistanî stratejîyêka newîye ya eskerî û sîyasî eşta dewre. İşgalkerdişê Efrînî ra pey, Dewleta Tirkîya nika zî hêzêko eskerî sewqê hidûdê xo û Rojavayê Kurdistanî kerdo. Bi namê ‘Herêma Asayîşine’ kena kedest rono heme erdanê Rojavayê Kurdistanî ser o. Dewleta Tirkîya hetêk ra zî kena ke 3.500.00 mihacirê Sûrîya ê ke Tirkîya de yê neqlê ‘Herêma Asayîşine’ biko.
Belê, Dewleta Tirkîya bi nê 3.500.000 kesê ke zafê xo Ereb ê, bierşawo Rojavayê Kurdistanî û bi no qayde demografîya Rojavayê Kurdistanî bibedilno. Dewleta Tirkîya bi nê sîyaset xo , eslê xo de wazena ‘Projeya Kemera Erebî’ newe ra bîyaro ca.
Dewleta Tirkîya key ke biwaza hêrişê Rojavayê Kurdistani bika, tehdîdê YPG xo rê kena bahane. La aşkereyo ke, meqsedê Tirkîya seba astengkerdişê tehdîdan nîyo; Tirkîya kena ke Rojavayê Kurdistanî îşgal bika û statuyêka sîyasî ya ê perçeyê Kurdistanî çin bika.
Eke destê Dewleta Tirkîya ra bêro, dest ronena heme serkewtiş û qezencanê Rojavayê Kurdistanî ser o. Îdarekarê Dewleta Tirkîya û bi taybetî zî ixtîdarê AKP û MHP bi sîyasetê hêrîşkar û dagirkar, bi sîyaseto ke dişmenetîya Kurdan ser o ameyo ronayîş, kenê ke pêlê şowentî xurtêr bikê. Seba ke îxdîdarê xo vindî nêkerê winî kenê. La aşkereyo ke, CHP û İyi partî zî hetkarîye danê nê sîyasetê îşgalker û hêrîşkar. Heme partîyê Tirkan seba îşgalkerdişê Rojavayê Kurdistanî mîyanê xo de ‘mitabaqetêko milî’ nayê ro.
Lazim o şarê Kurdî vera nê ‘mitabaqatê milî ‘ yê partîyanê Tirkan de vengê xo vejo û hayîdar bo.
Bi taybetî zî mesulîyetêko pîl keweno hereketê sîyasî yê Kurdanê Rojavayê Kurdistanî ser o.
Her çî ra ver heme aktorê sîyasi ê Rojavayê Kurdistanî gere Mitabaqatê Hewlêrî û Dihokî esas bigîrê û nê esasî ser o îdarekarîyêka ortaxe ya eskerî, sîyasî û tîcarî awan bikerê. Gere heme aktorê sîyasî beşdarê nê prosesî bibê.
Ma onca venga PYD, TEV-DEM, ENKS û heme partiyê Kurdan danê ke wa stratejîyêka netewî ser o mitabaqatêko hîra awan bikerê.
Dewleta Tirkiya sîyaseto ke Rojavayê Kurdistanî ser o kena, wazena Vaşûrê Kurdistanî ser o zî kena. Dewleta Tirkîya demo peyên de demên zî bi bahaneyê PKK hêrişê Vaşûrê Kurdistanî kerda û nika erdê Vaşûrê Kurdistanî ser o dest bi viraştişê qereqolê eskerî kerda. Ne gamê eskerî ê Tirkîya her çî ra ver derbêka pîle danê huzur û îstîkrarê Vaşûrê Kurdistanî ro.
PKK zî bi çalakîyanê xo yê eskerî, Vaşûrê Kurdistanî de bena sebebê hêrişê Dewleta Tirkîya.
Mîyanê nê şertan de çalakîyê eskerî yê PKK ê ke Vaşûrê Kurdistanî de benê zerarêko pîl danê qezencanê federe û benê sebebê provokasyonanan. Lazim o PKK hurmet nîşanê estbîyayîş û îradeyê hukmatê Federe yê Vaşûrê Kurdistanî bido û gere hem Vakurê Kurdistanî de hem Vaşûrê Kurdistanî de şer vindarno, fek çalakîyanê xo yê eskerî ra verado.
Ma reyna wazenê eleqeyê her kesî biance na rastîye ser o ke, Dewleta Tirkîya hetanî ewro senî ke nêeşkaya bi operasyonanê eskerî meseleya Kurde safî bika, ewro ra tepîya zî do nêeşko na mesela safî bika.
Gere her kes weş na rastîye bizano. Ma reyna tîya ra veng danê Dewleta Tirkîya ke wa vera Kurdan fek sîyasetê şer, hêrîş, şîdet û dişmenetî ra verado.
Ma tîya ra veng danê Dewleta Tirkîya ke, wa hurmet nîşanê heq û azadîya meşrû, milî, demokratîk û heqê statûya sîyasî ya şarê ma yê Rojavayê Kurdistanî bido. Lazim o Dewleta Tirkîya hurmet nîşanê heqê statûya sîyasî yê şarê ma yê Rojavayê Kurdistanî bido.
Heto bîn ra gere Dewleta Tirkîyeyê hurmet nîşanê serdestîya meşrû ya Vaşûrê Kurdistanî bido û lazim o hikumranîya Federe ya Vaşûrê Kurdistanî qebûl biko.
Meseleya kurd û Kurdistanî meseleya ‘ terorî’ nîya. Dewleta Tirkîya nêeşkeba bi hêrîş û operasyonanê eskerî na mesela çin biko. Klîdê çareserîya na mesela, qebûlkerdişê heq û azadîyê netewî û demokratîk yê şarê Kurd o.
Ma venga Hukmatê Merkezî yê Iraqî û Hukmatê Herêma Kurdistanî zî danê ke, wa vera hêrîşanê Dewleta Tirkîya yê ke zerarêko pîl danê şarê ma yê Vaşûrê Kurdistanî hêrsê xo nîşan bidê.
Ma venga şarê xo, venga heme partîyanê sîyasî yê çar perçeyanê Kurdistanî danê ke wa vera nê hêriş û îşgalkarî de her parçeyê welatî de vengê xo vejî û hêrsê xo nîşan bidî.
Sârê ma û heme partîyê sîyasî yê her çar perçeyanê Kurdistanî bi hişmendîyêka netewî û niştimanî, gere vera provokasyonê ke benê sebebê şerê mîyanê xo hayîdar bê û lazimo vera nê provokasyonan hêrsê xo nîşan bidê.
09.08.2019
PAK(Partîya Azadîya Kurdistanî)
PSK(Partîya Sosyalîst a Kurdistanî)’’