Merkezê Xeberan - Serekê Partîya Azadîya Kurdistanî (PAK) Mustafa Özçelik û Serekê Partîya Sosyalîst a Kurdistanî (PSK) Hıdır Tek:
“Roja 13.04.2020î de rojnameyê Millîyetî de, rîpelê 16inî de bi îmzaya Hakkı Ocalî, bi sernameyê “Partîyê ke Iraq de ca gênê kişta kamî de ca gênê”derheqê partîyanê ma,Partîya Azadîya Kurdistanî, (PAK) û Partîya Sosyalîst a Kurdistanî (PSK) de îthamê zûrî û neheqî ca girewtî. Mekale de, şîrove û çîyê ke esasê meslegê hûqûq û rojnamegerî nîyê ca girewtî. Ma vera nê îtham û bêhûqîqîye, midurê rojnameyî û nuştoxî rê tezkîp erşawit. Çi heyf ke rojnameyê Millîyetî ca nêda nuşteyê tezkîpê ma. Rojnameyî bi no qayde hetêk ra heqê ma yê tezkîpî yo hûqûqî binpay kerd hetêk ra hûqûq, edelet û exlaqê rojnamegerî binpay kerd.
Her çî ra ver wa naye bêra zanayîş ke, Partîya Azadîya Kurdistanî, (PAK) û Partîya Sosyalîst a Kurdistanî (PSK) bi hûqûqî amê ronayîş û partîyê ke bi rayê demokratik falîyetanê xo kenê yê.Berêz nuştox, zehmet nêkerdo ke bikewo keyepelê Yargitayî, eke biewnêne cin a raştîye dîyêne. La yeno fehmkerdiş ke, tekîlîya ê nuştoxî bi raştîyan çîn ya. Ovatişanê dişmenetî, şovenîstî û cîyakerdişî sey rojnamegerî vîneno.
Heto bîn ra partîyê ma, binê temînatê azadî yê Soznameyê Qanûnê Heqanê Merdiman yê Ewropa (AİHS) û Qanûnê Bingehînî de yê.Heqê ma estbi ke ma nuşteyê tezkîpî înan rê erşawit la seba ke înan nuşteyê ma nêda heqê ma esto ke ma şêrê mehkema û uca de heqê xo bigêrê. Wa bizanê ke ma do heta peynî heqê xo dima şêrê.
Nuştoxbi vatişê“bêtalîhî” îşaret keno ke ma bi çend partîyanê bînan 25ê Êlûla 2017î de semedê Referandumê Xoserî Herêma Kurdistanî xebate kerda û hetkarî daya xoserîya Herêma Kurdistanî. Ma sey partîyanê Başûrê Kurdistanî nîşan dano û vano, înan bi bayraqanê Îsraîlî û Amerîka Hewlêr de çalakî organîze kerda. La ma seba hetkarîdayîşê referandumê xoserîyeTirkîya û Kurdistan de verê çimanê her kesî de xebate kerde. La ê kesê ke xorê zûr û îftîra kerdê xûy seba înan qîmetê nê çîyan çîn yo.
Seke ma cor de zî qala ci kerd, ma Tirkîya de amê ronayîş û Tirkîya û Bakûrê Kurdistanî de falîyet kenê. Û partîyê ma; Partîya Azadîya Kurdistanî, (PAK) û Partîya Sosyalîst a Kurdistanî (PSK) Tirkîya de meseleya Kurdû Kurdistanî zî mîyan de wazenê wa heme meeleyî bi rayê dîyalog û demokratik bêrê safîkerdiş. Ma bi nê esasan ser o falîyetanê xo kenî. Partîyê ma her tim, bi, vengêko berz vanê ke, tu meseleyêk pê şîdet û pêrodayîş nênê çarekerdiş.
Partîyê ma, wexto ke Pasûr de 5 kurdê sîvîlî bi herîşê bombeyînî de ameybî kiştiş K beyanatêk day, PKK ra waşt wa fek şîdetî ra verado, adirbest îlan biko, dewleta Tirkîya ra waşt wa meseleya Kurde bi rayîrê aştîyane û bi dîyalog çare biko. La çi heyf ke Rojnameyê Millîyetî makaleye xo de nîşan kerd ke, partîyê ma PKK dir mîyanê têkilîye de yê û kontrolê PKK de yê.Ame îdîakerdiş ke, mabênê ma û PKKde têkilîya aîdîyetî esta. Na îdîa bê bingeh a, xeyal û bê belge ya. Na îdîa çine hesibnayîşê xoserî û nasnameyê partîyanê ma ya. Esas de no muamele zî nişan dano ke, dewamê sîyasetê dewleta Tirkîyake timî vana “Kurd û PKK, PKK û teror yew ê” yo.
Ewro Rojameyê Millîyetî û ê bînî ke girêdayîyê hukmatî yê, şarî rê raştîyan nêvanê, kesê ke behsê heq û azadîya Kurdan kenê, înan sey “terorîst”, “terorî ardim kenê”nîşan danê û hedef nîşan danê.
Rojnameyê Millîyetî û o nuştox zî, veynenê hîsanê şoven û nijadperest yê şarê Tirkî û partîyanê ma hedef nîşan danê. Xora partîyê ma her tim binê tehtîdê nê hetan de yê, raştê herîşanê înan yenê. Wa bêro zanayîş ke eke herîşê neweyî bêrê kerdene, mesule ci o rojname û o nuştox o.
O mekale de zanayîşêko zelal û belgeyêk çin bi. îthamê ke seba ma vajîyay pêro zûr ê. Ma semedê heqanê şarê xo yê demokratîkan, Bi rayîrê demokratîkî azadîya şarê xo, edelet û demokrasi wazenê. Rojnameyî ê makaleye xo de partîyê ma rayapêroyî de hedef nişan day.
Ma reyna vanê, îthamê ke makale de ca girewtê raşt nîyê,gorê qaydeyanê hûqûqî nîyê, ma do heme heqanê xo yê hûqûqî nimite tepiştenê û rayapêroyî reyde bi hürmet pare kenê.”
22ê Nisana 2020î
Serekê Partîya Azadîya Kurdistanî (PAK) Mustafa Özçelik
Serekê Partîya Sosyalîst a Kurdistanî (PSK) Hıdır Tek