PAK(Partîya Azadîya Kurdistanî) roja 20.03.2021 Teşkîlatê Amedî yê PAKî de kombîyayîşê çapemenî tertîp kerd.
Kombîyayîşê çapemenî de, PAKî derheqê rojdemî yê Kurdistanî û sîyasetî de pêşniyazîyê xo pêşkêşê raya ûmûmî kerd û Newroza şarê ma fîraz kerd.
Kombîyayîşê çapemenî gorê tedbîrê Covîd-19yî virazîya.
Destpêkê kombîyayîşê çapemenî de semedê şehîdanê Newroze û heme şehîdanê Kurdistanî rêz ame girewtene.
Badê Vervatoxê Çapemenîya PAKî Hanifi Turanî beyanatê PAKî ya bi Kurdkî wend.
Beyanato ke kombîyayîşê çapemenî de amee wendiş cêr de yo:
Ma adirê Newrozê bi vengdayîşê vindarnayîşê şerî û bi hişmendîya netewî webike
Emşo Newroz a.
Newroze semedê miletê Kurdî roşan a, xoverrodayîş a, serehewanayîş a, mijdana azadî ya.
Newroze tena roşanê miletê Kurd ney, roşanê heme şaranê Aryanî ya. Heto bîn ra 21ê Adare Roja Têkoşînê Mîyannetewî ya Vera Nîjadperestîye ya.
Rijyayîşê zulmê Dehaqê gonîwerî ra hetanî ewro, semedê azadî, adirê Newroze her tim ameyo tafînayîş yan zî wekerdiş.
Pa heme hêrîş, tehluke û planê xêrnêwezan zî, destvistişê Dewleta Federe ya Başûrê Kurdistanî, destvistişê Rojavayê Kurdistanî û têkoşînê neteweyî, niştimanî yê Bakur û Rojhilatê Kurdistanî, na Roja Newroze de zî, dewaya azadî û xoserîya Kurdistanî de semedê zêdekerdişê hêvîyanê ma paştîyêka pîl a.
Ma sey PAK vanê, Bakurê Kurdistanî de bi wesîleya Newroze, bi vengê milyonan ma venga Dewleta Tirkîya bide ke heme şer û operasyonanê xo yê eskerî vindarno.
Ma venga PKK danê ke, nê şerê xo yê çekdarî vindarno. No şero çekdarî yo ke Bakurê Kurdistanî de dewam keno, Bakur, heto bîn ra bi taybetî Başûr û Rojavayê Kurdistanî de zî zerar dano şarê ma.
Seke yeno zanayîş serra 2019 de, semedo ke nameyanê înan de ‘Kurdistan’ esto, derheqê PAK, PSK , PDKT û KKP de dewayê qefilnayîşî ameybî akerdene.
Serdozgerê Mehkemeya Berze yê Dewleta Tirkîya, îdîanameya dewaya qefilnayîşî ya PAKî de vano ‘Namê PAKî û bernameyê ey vera Qanûnê Bingehînî û vera Qanûnê Partîyan ê. Heto bîn ra PAK bê ziwanê Tirkî behsê ziwanêkê bînî û behsê perwerdeyîya ê ziwanî keno, coka nîjadperestî keno’. Yan zî gorê Serdozgerê Mehkemeya Berze yê Dewleta Tirkîya, behs kerdişê estbîyayîşê ziwanê Kurdî û waştişê perwerdeyîya zimanê Kurdkî ‘nîjadperestî’ yo.
Dewaya qefilnayîşî ya ke derheqê PAKî û ê 3 partîyanê bînan de ameya akerdene hîna zî dewam kena.
Nika zî Serdozgerê Mehkemeya Berze ya Dewleta Tirkîya roja 17.03.2021 de Mehkemeya Qanûnê Bingehînî de derheqê HDPyî (Partîya Demokratîk a Şaran) de dewaya qefilnayîşî akerda.
Dewleta Tirkîya hetêk ra zî derheqê partîyan de dewaya qefilnayîşî akena, hetêk ra zî nêverdena wa partîyê neweyî ê sey PDK-Bakur, PIA û PDK sey qanûnî bêrê ronayîş.
Dewaya qefilnayîşî ya derheqê HDPyî de ameya akerdiş , bin pakerdişê heqê azadîya fikrî, azadîya xo îfade kerdişî û xebata rêxistinî ya. PAK ke derheqê ey de doewaya qefilnayîşî ameya akerdiş, helbet ke no teşebus û hewlê Dewleta Tirkîya, hewlê Serdozgerê Mehkemeya Berze, yê derheqê qefilnayîşî yê HDPyî de zî sey gamê ke nênê qebûlkerdiş hesibneno.
Ma sey PAK cezaya ke Birêz Ömer Faruk Gergerlioğluyî rê ameya birnayîş û betal kerdişê parlamenterîya ey protesto kenê. Birêz Ömer Faruk Gergerlioğlu kesêko heqpawitox o û demê Referandûmê Xoserîye yê 25ê Êlûla 2017î de, sey endamêkê Înisiyatîfê Hetkarîya Referandûmê Xoserîye bajarê Batmanî de xebatêka ercîyaye û aktîf kerd.
Rîpelê tarîxê Dewleta Tirkîya bi padayîşê zaf partîyan dekerde yê. La senî ke hetanî ewro qefilnayîşê partîyan, astengkerdişê partîyan tu mesela û problem çareser nêkerdo, ewro ra tepîya zî do tu mesela û probleman çareser nêko. Êyê ke wazenê partîyanê yasayî, sîyasî biqefilnê, gelo wazenê Kurdan rayîr û metodanê sivîl, sîyasî, demokratîk dûr bifînê û verê înan bidê şer û şîdet?
Ma bi zelalî wazenê beyan bike ke, ma do nêkewe dama nê xêrnêwazan. Ma do bi qerardarî şer rê, her tewir rayîr û metodê şer, çekdarî û şîdetî rê vaje, ‘ney’. Ma do raybazê sîyasî, demokratîk û sîvîl xebatanê xo bidomnê.
Nika CHP û İyi Partii sere de, tay partîyê Tirkan vanê, key ke ma ameyê sere, ma do sondao ke verê cû mekteban de ameyêne wendene, sey sondê nîjadperestîye newe ra domanan rê bide wendene. No zî rastîya heme partîyanê ke falîyet kenê mojneno ma.
Ma venga Dewleta Tirkîya û venga heme partîyanê îqtîdarî û yê mixalefetî de danê ke wa fek sîyasetê xo yê 98 serrî ra veradê. No sîyaseto ke 98 serrîyo ke hişmendîya înkar, asîmîlasyon, çîne hesibanayîş, kiştiş û şîdetî ser bîyo tu problemêk safî nêkerdo û do ewro ra tepîya zî çîyêk safî nêkero.
Ma venga miletê Kurd û şarê Kurdistanî danê ke ma nêbe hetkarê partîyê ke vanê ‘yew dewlete, yew Milet, yew welat, yew ale’ û ma nêkewe binê versîyaya înan, ma nêbe boça ê partîyan. Ganî demokarasî zî, azadî zî, edalet zî, heqê Kurdan zî nêverdîyo însafê ê partîyan. Ma hêz nêde sîyaseto ke estbîyayîşê miletê Kurd û Kurdistanî çîne hesibneno. Heta ke ma sey miletêk waitişanê xo yê esasî yê neteweyî, demokratîk ser o nêvinde, nêbe temsîlkarê xo, ma do nêeşke heqanê xo qezenc bike, ma do nêeşke vernîya nê neheqî, zulum û bêrêzîyê ke ma rê benê bigîrê.
Bêne ma pêro-pîya rayîrê xo ra şîrê.
Bêne ma Bakurê Kurdistanî hetêk ra Newroza 2021 bike destpêkê pîya xebate, hemkarî û îtifaqê ser hişmendî û prensîbê neteweyî, niştimanî. Ma game bi game yewitîya partî û hêzê ke erdê Kurdistanî ser o statuyêka sîyasî, neteweyî, milî awan bike.
Û bêne hetêk ra zî, ma sey destpêk nê waştişanê xo ser o, nê waştişê ke ma cêr de vatê, waştişê netewî, demokratîk ser o hêzanê xo bike yew, ma hetêk ra zî sey temsîlkarê miletê xo têbigêre:
Ganî Dewleta Tirkîya fek nê şerî ra verado û semedê çareserîyêka sîyasî heme partîyanê Kurdan reyde bikewo mîyanê dîyalogî.
Ganî PKK cade şerê çekdarî vindarno.
Ganî heme qedexeyê vernîya azadîya çapamenî, fikrî û xebata rêxistinî bêrê wedaritiş.
Ganî dewayê qefilnayîşî yê ke derheqê partîyanê ke bi nameyê ‘’Kurdistanî’’ ameyê ronayîş û partîyanê bînan de ameyê akerdiş, bêrê betal kerdene. Qedexeyê ser namê Kurdistanî bêro wedartiş.
Ganî Dewleta Tirkîya Qanûnê Bingehînî û heme yasayanê xo de estbîyayîşê miletê Kurd qebûl biko û ganî ziwanê Kurdî bibo ziwanê perwerdeyî û bibo ziwanê fermî.
Ganî Dewleta Tirkîya Peymana Otonomîya Rayberîya Herêmî yea Ewropa û Peymana Heqanê Domanan bîyara ca.
Ma wazenê ke Dewleta Tirkîya gorê qeraranê AHIMî hereket biko û cade heme hepsîyanê siyasî, nuştox û roşnvîranê ke hepisxaneyan de yê serbest verado, dewayê ke înan rê ameyê akerdiş betal biko.!
Belê, Miletê Kurd gama ke sey hetêk nê waştişan ser o yewitîya xo awan biko, helbet ke ganî semedê caardişê nê waştişan bi hêzanê azadîwaştox, demokrat û edaletwaştoxanê Tirkîya reyde zî mîyanê dîyalogî de bo û rayîrê hemkarîyan xurt biko.
Ma na wesîleya Newroze ra reyna vanê, her destvistişêkê her perçeyêkê Kurdistanî ma sey destvistişê xo vînenê. Wayîrvejyayîş û pawitişê her destvistişê neteweyî, niştimanî yê her perçeyêkê Kurdistanî wazîfeyêko neteweyî û tarîxî yo.
Ma reyna bi taybetî venga heme şarê xo danê ke, bi îmzeyanê xo hetkarî bidê kampanyaya ke wazîyeno wa ziwanê Kurdî bibo ziwanê fermî û bibo ziwanê perwerdeyî. Semedo ke zêde ra îmzayî bêrê arêdayene ganî ma berê her kesî pirode.
Belê emşo Newroz o.
Bawerî, hêvî, sebir, îtifaq, xebate, biryardarî, têkoşîn ganî her tim raybazê newroze bê.
Ma bin ê hîs û bawerîyanê xo Newroza şarê xo fîraz kenê.
20.03.2021
Buroya Çapemenî û Têkilîye ya PAKî''