Parêzgearê Musena Ehmed Menfî daxwaza lêborîna ji gelê Kurd û hikûmeta Herêma Kurdistanê kir û dibêje ew helwesta efserekî Artêşa Iraqê ku li ser gora bikomî ya li Semaweyê daxwaz ji kesûkarekî Enfalkiriyan kiribû, Ala Kurdistanê bîne xwarê, karekî takekesî bûye û karên yasayî dê bêne kirin.
Parêzgearê Musena Ehmed Menfî beşdarî bultena Rûdawê bû û li helwesta wî efserekî Artêşa Iraqê ku li ser gora bikomî ya li Semaweyê ji kesûkarekî Enfalkiriyan xwestibû Ala Kurdistanê bîne xwarê, daxuyanî da û ew helwesta wî weke takekesî binav kir.
Ehmed Menfî ragihand ku wan komîteyeke taybet ji bo lêkolîna bi wî efserê artêşa Iraqê re pêk aniye, ku li Semawe rê li ber ala Kurdistanê girtiye û got: “Li Semawe û derdora wê bi dehan gorên bikom hene ku piraniya wan rûfatên welatiyên Kurd ên enfalkirî li xwe digirin.”
Menfî da zanîn ku Ala Kurdistanê destûrî ye û wiha pê de çû: “Ala Kurdistanê li gor destûra Iraqê, fermî û yasayî ye û ew efserê ku li ser gora bikom rê li ber ala Kurdistanê girtibû, bi serê xwe ev kar kiriye û ew karekî takekesî bû. Me komîteyeke lêkolînê pêk aniye, ku vê pirsê dişopîne.”
Parêzgearê Musena herwiha diyar kir ku heya niha derdora 80 rûfatan bo Pizîşka Dadê yê Bexdayê hatine veguhastin.