"Mamosteya Kurdkî Mizgîn Yalçine, rîyê vîdyoya ke nameyê bajaran bi Kurdkî musnena wendekaran ra, medyaya dîjîtale ser ra sey hedef ameybî nîşandayîş, rastê hêrîşanê nijadperestî û şowenîstanê tirkan ameya.
Zanîyeno ke nika telewîzyonêka dewlete ya bi nameyê TRT-KURDÎ esta, dersa weçînitî ya bi kurdkî û beşê ziwanê kurdkî tay unîwersîteyan de esto; labelê çi heyf ke nê sê hîrê dezgehî zî sey fermî nêameyê tesdîqkerdiş. Hîna zî sey fermî estbîyayîşê kurdan, perwerdeyê bi ziwanê kurdkî nêameyo qebûlkerdiş. Parlamentoyê Tirkîya de ziwanê kurdkî sey ‘’ziwanêko nênas’’ îfade keno. Namê bajar, qeza û dewanê kurdan ê ke bi namê tirkî ameyê bedilnayîş, semedê kurdkî nêameyê bedilnayîş û namê înan ê kurdkî bi hawayêko fermî nêameyê qebûlkerdiş.
Pa nê sîyaset, kerdên û teşebûsê xo yê 100 serrî, Dewleta Tirk, sîyasetê xo yê şîdetî yo vera kurdan, nê serranê peyênan de resaya na merhela ke, mîyanê cimatê tirkan de pêlê nijadperestî û şowenîzmî berzêr û xurtêr kerda.
Kurdî bi ziwanê xo, bi kulturê xo, bi tarîxê xo bi hezaran serrîyo ke cografayaya Kurdistanî ser de cuyenê. Ziwanê kurdkî zî, namê bajar, qeza û dewanê Kurdistanî zî, wayîrê vîyarteyêko zaf derg û tarîxêko zaf kehen ê.
Ê kesê ke tehamulê înan ziwanê kurdkî û namekerdişê bajar, qeza û dewanê kurdkî rê çin o; hêzê xo sîyasetê Dewleta Tirkîya yo vera Kurdan ra gênê. Na helwesta înan, nîşanê bêtehamulîya vera estbîyayîşê kurdan, vera ziwanê kurdkî ya. Ziwanê kurdkî estbîyayîşê miletê kurd o.
Ma helwesta nê nijadperest û şowenîstê tirkan ya vera Mamoste Mizgîn Yalçine şermezar kenê û ma vanê ‘’Mamoste Mizgîne bêwayîr nîya û ma hetkarîye danê Mamoste Mizgîne’’.
Ma veng danê rayberanê Dewleta Tirkîya ke wa cade derheqê ê kesanê hêrîşkar û nijadperestan de dewa akerê.
Ma veng danê her kurdêk, heme baroyan, dezgehanê sivîl, demokratîk, partîyanê sîyasî, veng danê her keso ke heqê merdiman paweno, vera nijadperestî û şowenîzmî vejîyeno û wazenê wa vera hêrîşê ke Mizgîn Yalçine rê bîyê vejîyê, vengê berz bikê û hetkarî bidê ci.
Mamoste Mizgîne dewa Malabadî ya qezaya Farqînî ya Amedî ra ya, sey karmendêka Wezaretîya Perwerdeyî ya Dewleta Cimhûrîyeta Tirkîya mamostetîya kurdkî kena.
Mamoste Mizgîne medyaya dîjîtale ser ra bi vîdeoya ke odayêka keyeyê xo yê Êlihî (Batmanê) de hadre kerda de dersanê kurdkî dana û ser hesabê xo yê medyaya dîjîtale ser ra bi namê “Kurdkî Online” zî vîdyoyanê dersanê xo yê kurdkî pare kena.
Buroya Çapemenî ya Partîya Welatparêzanê Kurdistanî (PWK)