PÊLKURD, PSK, TEVGER, PAK, PDK-BAKUR Amed de derheqê Jenosîdê Helebçeyî de beyanatêko pîya da

PÊLKURD, PSK, TEVGER, PAK, PDK-BAKUR Amed de derheqê Jenosîdê Helebçeyî de beyanatêko pîya da

PÊLKURD, PSK, TEVGER, PAK, PDK-BAKUR roja 16.03.2021 de Cemîyeta Rojnamegeran ya Amedî de derheqê Jenosîdê Helebçeyî de beyanatêko pîya da.

Destpêkê kombîyayîşê çapemenî de Vervatoxê PAKî Hanifi Turan qiseykerdişêko kilm kerd. Badê cû semedê şehîdanê Helebçe û heme şehîdanê Kurdistanî yew deqîqe rêz ame girewtiş. Badê zî nameyê 5 partî û hereketan ser o hetkarê Serekê Pêroyî yê PSKyî Bayram Bozyel beyanato wertax wend.

No zî beyanatê pîya yê 5 partî û hereketanê Kurdistanî yo:

‘’MA JENOSÎDÊ HALEPÇE VÎR NÊKERDO, MA DO VÎR NÊKE ZÎ!

Seke yeno zanayene, 33 serrî verê cû rojêk sey roja ewroyî, dewleta dagirkere ya Îraqî dormeleyê şaristanê Helebçe bi teyarayanê eskerî vera şarê Kurdistanê hêrîşêk da dest pêkerdene û ê teyarayan çekê kîmyayî ser Kurdistaniyanê sîvîlan de varna. Netîceyê hêrişan de çi heyf ke qasê 5 hezar domanî û kênayî, kal û pîrî, cinîyî û camêrdî merdî, bi hezaran kesî zî birîndar bîyê. No herîş qismêk operasyona Enfalî bi, ke dewleta dagirkere 1983 de dest pêkerdbi, 182 hezar Kurdistanî qetil kerdbî û esas de meqsed no bi ke waştêne şorişê Başûrê Kurdistanî vindarnê.

Seke zanîyeno, o wext bi se hezaran şaro sîvîl yê başûrê welatê ma, semedo ke keye û tutanê xo merdişî ra bixelisnê, bêçare mendê ke mal û wareyê xo terk bikê. Dewletê dinya vera na trajedîya pîle xo kerd ker û lal û kurdan bi tena sereyê xo verda. Bê çend dewletanê qijan, tu dewletêka dinya ne vera nê hêrîşê koyî yo ke welatiyanê ma yê sîvilan rê bi vengê xo vet û ne zî rejîmê jenosidkarî şermezar kerd.

Labelê, ma pê sereberzê ke şarê kurdî yê bakur, rojhelat û rojavayê Kurdistanî wayîrê ê way û birayanê xo vejya, bi heme îmkananê xo înan rê ardim kerd û birîna înan derman kerd. No zî reyna ispat kerd ke, her çiqas erdê Kurdistanî ameyo parçekerdiş û tu dewletêka xosere ya kurdan çinya zî, şarê Kurdistanê pîlî bi hişmendiyêka neteweyî hereket keno, bi dej û birîna her kurdêkê/a rîyê erdî xemgîn beno û bi serkewtişê ey/aye keyfxweş beno.

Coka, her çiqas operasyona jenosîdkare ya Enfalî û komkiştişê Helebçe tarîxê nêzdî yê kurdan de trajedîyêka pîle bo zî, ganî mêra vîrkerdene ke, jenosîdê vera kurdan her çar parçeyanê Kurdistanî de ewro zî dewam keno, û no jenosîd tena pê kiştişê kurdan nêbeno. Dewletê dagirkerî bêmabên û pêro pîya kenê ke, kurdan hetê kulturî ra û siyasî ra zî çîne bikê. Nê siyasetê dewletanê dagirkeran senî ke 32 sserrî verê cû Helebçe de bibi, ewro zî eynî sîyaset Kerkûk, Efrîn, Serêkanî, Mehabad û Amed dezî dewam keno.

La, ma onca pê sereberzê ke, şar ma yê çar hetê Kurdistanê pîlî bi hişmendiyêka neteweyî vera nê sîyasetê jenosîdkarî vejîyeno, xo ver dano û têkoşînê xo domneno.

Tu jenosîd û zulum her çar perçeyanê Kurdistanî de zî nêeşkayê verê têkoşînê dewaya azadî, xelisyayîş û xoserîya Kurdistanî bigîro. Kêna û laj û tornê qurbanîyanê jenosîdê Helebçe ewro Başûrê Kurdistanî de bi destvistişê dewleta federe, Alaya Kurdistanî ser Parlamentoya Kurdistanî de têraşanî. Her ê kêna û laj û tornê qurbanîyanê jenosîdê Helebçe, 25ê Êlûla 2017 de, Kerkûk û Şengal zî mîyan de heme şaristanê Başûrê Kurdistanî de, Referandûmê Xoserîye de, bi hawayêko demokratîk, bi se ra %93 xoserîye rê vatê ‘e/ya’.

Ma venga Neteweyê Yewbîyayî, Yewîya Ewrûpa û raya pêroyî ya dinya danê ke roja 16ê Adare sey roja jenosîdê Kurdan qebûl bikê. Ma heto bîn ra venga Hukmatê Herêma Kurdistanî danê ke semedê nê armancî heme hêzanê welatperweran reyde kar û xebate bikê.

Bi nê hîs û fikrê xo yê neteweyî, ma sey partî û rêxistinê Kurdistanî ê ke cêr de nameyê înan estê, kede û xebate û destvistişanê neteweyî, niştimanî yê her çar perçeyanê Kurdistanî rê wayîr vejîyenî. Ma bi wesîleya 33ine serrgêra komkiştişê Helebçe de, heme qurbaniyanê jenosîdê Helebçe û şehîdanê dewaya azadî, xelisnayîş û xoserîya Kurdistanî bi hurmet yad kenê.

PÊLKURD, PSK, TEVGER, PAK, PDK-BAKUR’’