Cîgirê Serokê Amerîkayê Mike Pence û Serokê Herêma Kurdistanê Nêçîrvan Barzanî, peywendiyeke telefonî encam dabûn.
Koşka Spî derbarê peywedniya telefonî ya Cîgirê Serokê Amerîkayê û Serokê Herêma Kurdistanê daxuyaniyek belav kir.
Di daxuyaniyê de hatiye gotin ku di wê peywendiya telefonî de jibilî gotûbêjkirina têkiliyên di navbera Hewlêr û Bexdayê de, asayîşa Herêma Kurdistanê, hewldanên pêkanîna seqamgiriyê li herêmê û vegera awareyan bo cih û warên wan, ji mijarên vê peywendiya telefonî bûn.
Herwiha hatiye gotin ku Mike Pence û Nêçîrvan Barzanî, êrişên li ser Kurdên Êzidî bibîr xistine û ew lihevkirina derbarê rêlibergirtina jinûve derketina DAIŞê, teyît kirine.
Pence di vê hevîdtinê de nîgeraniyên xwe yên derbarê, ‘têkbirina asayîş û aramiya Iraqê bi destê milîsên bi ser Îranê ve’ anîne ziman û diyar kiriye Amerîkayê dê ji bo kêmkirina karîgeriyên van grûpan li Iraqê, gav biavêje.
Pence piştevaniya welatê xwe bo çareskirina kêşeyên di her warî de yên navber Hewlêr û Bexdayê de dupat kiriye.
Herwiha pêşvebirina peywendiyên Amerîka û Herêma Kurdistanê û hevbeşiya di navbera herdu aliyan jî beşek bûne ji wê peywendiyê.
Serokatiya Herêma Kurdistanê, duh bi daxuyaniyekê aşkere kiribû ku Serok Nêçîrvan Barzanî û Cîgirê Serokê Amerîkayê Mike Pence di peywendiyekî telefonî de rewşa Herêma Kurdistan û Iraqê nirxandin û tekezî li ser berdewamiya hevbeş a Amerîka û Herêma Kurdistanê û girîngiya hevkarî û hemahengiya di navbera Herêma Kurdistan û Iraq û hebûna mekanîzmekî hevbeş ya ji bo vê mebestê, bi alîkariya Amerîka ya ji bo rûbirûbuna metirsiyên serhildana terorê kirin.