Navenda Nûçeyan - Şarazayê leşkeri û şêwirmendê serokê herêma Kurdistanê ferîqê yekem Babekir Zêbarî ji BasNewsê re ragehand: ‘’Paşmayên çekdarên rêxistina terorîst a DAIŞê demeke xwe birêxistin kirine û roj bi roj bihêztir dibin. Ji ber wê berdewam tevgera wan zêde dibe û rojane jî êrîş dikin ser hêzên Iraqê û hemwelatîyên sivîl. Ev yek jî bûye sedemê belavbûna tirs û xofeke mezin nav xelkê de.’’
Herwaha got: ‘’Çekdarên DAIŞê sûd ji vê valatîya ewlehîyê vergirtine ku ketine navbera hêzên Pêşmerge û artêşa Iraqê li navçeyên Kurdistanê. Ji ber wê jî hemwelatîyên wan navçeyan jî qurbanên serekî ne, eger çareserîyek hevbeş neyê dîtin rewşa navçeyê metirsîdartir dibe.’’
Zêbarî got: ‘’Piranîya çekdarên DAIŞê Iraqî ne û xelkê navçeyê ne. Bi roj sivîl û mijûlê karên xwe ne û şev jî çek radikin û kiryarên terorîstî pêktînin. Ev yek jî pêşhateyekî xirabe. Ji ber ew çekdar şarazayê navçeyê ne û bi asanî dikarin xwe nav xelkê sivîl de veşêrin.’’