Ma 8000 şehîdanê Enfalê Barzanîyan bi hurmet yad kenê
Roja 31ê temmuza 1983î de qirkerdişê Enfalê Barzanîyan dest pêkerd. 8 Hezar camêrdê Barzanîyan, 7 serrî ra heta 85 serrî, hetê rejîmê Seddamî ra, herêma Barzanî ra amey vetiş. Nê merdimî neqlê mintiqaya Kuştepe ke wîlayetê Hewlêrî ser de ya û kampê Kudus û Kadisiye bîyî. Nê kesî kampan de sey êsîr amey tepiştene. Camêrdê Barzanîyan bi rojan bê awe û bê nan mîyanê ê kampan de mendê. Peynîya eziyetêkê pîlî de amey vindîkerdiş.
Çi ame ê merdiman sere heta ewro nêno zanayîş. Nê jenosîdî ser ra 41 serrî vîyartî, la hîna zî zafanê ê 8 hezar merdiman ra xeberêk nêameya girewtiş. Ne merdimî ameyê îmxakerdiş û ameyê binerdkerdiş.
Cenazeyê tayn kesan no demo peyên de ameyê vînayîş.
Ma serrgêra Enfalê 8 hezar Barzanîyan a 41ine de, şehîdanê Enfalê Barzanîyan û heme şehîdanê Kurdistanî bi hurmet yad kenê. Ma Enfalê Barzanîyan reyna şermezar kenê.
Ma vanê cewabo tewr pîl û bitesîr vera Enfalê Barzanîyan no yo ke, heme hetê Başûrê Kurdistanî tifaqê xo yê neteweyî, niştimanî bîyarê ca û heme kurdê dinya destvistişê federe yê Herêma Kurdistanî rê wayîr vejîyê, bipawê, aver berê.
31.07.2024
Buroya Çapemenî ya Partîya Welatparêzanê Kurdîstanî (PWK)