Rojnameger Egîd Roj di êrişeke li Bendava Tişrînê de hat kuştin.
Komên çekdar ên "Artêşa Niştimanî ya Sûriyeyê" ku Tirkiye piştgiriyê dide wan, zêdetirî du mehan e li başûrrojhilatê Minbicê û li herêma Bendava Tişrînê êrişan dikin.
Rojnameger Egîd Rojê ji Efrînê jî di êrişa bi dronan de li Bendava Tişrînê hat kuştin.
“Em bêdengiya saziyên navneteweyî qebûl nakin”
Komeleya Rojnamegeran a Dîcle û Firatê (DFG) derbarê kuştina rojnameger Egîd Roj daxuyaniyek da û got:
"Em bêdengiya saziyên navneteweyî ya dema ku rojnameger tên kuştin temaşe dikin û bê deng dimînin qebûl nakin.
Divê hem kuştina rojnameger Egîd Roj û hem jî kuştina rojnamegerên din were lêkolîn û divê berpirs di çarçoveya sûcên şer de werin cezakirin.
Berdêla wê çi dibe bila bibe em dê rojnamegeriyê biparêzin."
Divê were gotin ku rojnameger Nazim Daştan û Cîhan Bilgîn jî li heman herêmê di êrişên bi dronan de hatibûn kuştin.
Rêvebiriya Xweser a Rojavayê Kurdistanê ji van kuştinan Tirkiyeyê berpirsyar dibîne.
Rêxistina Çavdêriya Mafên Mirovan (HRW) jî ragihand ku ev êrişên li vê herêmê di çarçoveya sûcên şer de ne û xwest ku Tirkiye lêkolînekê li ser vê mijarê bike.
Lê Tirkiyeyê heta niha li ser vê mijarê ti daxuyanî nedaye.