Sekreterê Partiya Çep a Demokratîk a Kurd li Sûriyeyê (P.Ç.D.K-S) Salih Gedo diyar kir ku ji bo yekîtiya Kurd têdikoşin û ji tevgerên siyasî xwest ku berjewendiyên gelê Kurd esas bigirin.
Sekreterê Partiya Çep a Demokratîk a Kurd li Sûriyeyê Salih Gedo, der barê rewşa Suriyeyê ya dawî, sekna Kurdan a li Rojavayê Kurdistanê û avakirina yekrêziya Kurdî de, ji Ajansa Nûçeyan a Hawarê (ANHA) re axivî. Salih Gedo da zanîn ku gelê Kurd li Rojavayê Kurdistanê di demeke dîrokî û hesas re derbas dibe û got: ” Kurdan ji Serhildana 12ê Adara 2004an ve pêşengtiya şoreşa Sûriyeyê kiriye. Bi hezaran şehîd dane, destkeftî hatine bidestxistin. Niha jî pêvajoyek nû dest pê kiriye. Me weke Rêveberiya Xweser, Partiyên Rêveberiya Xweser û yên nêzî Rêveberiya Xweser ji roja yekemîn a hilweşîna rêjîmê re, ji bo avakirina Sûriyeke demokratîk amadebûna xwe ya ji bo danûstendina bi hikumeta nû re eşkere kiriye.”
‘Têkoşîna ji bo yekîtiyê didome’
Salih Gedo bi bîr xist ku bi salan e di navbera Partiyên Yekîtiya Niştimanî ya Kurd (PYNK) û ENKSê de li Rojavayê Kurdistanê danûstendin hene, niha jî van hewldanan didomînin û wiha axivî: “Hin welat jî di vê mijarê de destek didin wan. 9ê Kanûnê (2024), di bin sernavê ‘Di vê aloziyê de em yekrêziya Kurdî bi cîh bikin’ de partiyên PYNKê civiyane û şandeyek Fransî jî tevlî bûye.
‘Nerîna hevpar heye’
Salih Gedo da zanîn ku di civînê de nêrîna hevpar a wekî, “Em ji bo diyalogeke bê qeyd û şert amade ne, dengê me bigihînin ENKSê, kengî bixwazin em ê bi wan re bicivin. Heke di navbera me de nakokî hebin em wan nakokiyan deynin aliyekî din” derketiye holê. Şandeya Fransî piştî civîna wan bi ENKSê re civiyaye. Lê heta niha ji aliyê wan ve ti bersiv nehatiye dayîn. Tişta ku em ji ENKSê dibihîzin ev e; `Em beşekin ji opezsyona li Stenbolê ne, danûstendina me wê bi rêya opozsyonê re be`. Em dizanin ew opozîsyon girêdayî ajandeyên dewleteke herêmî ye ya ku dixwaze Kurdan tune bike, ev pirsgirêkek mezin e.”
Salih Gedo bal kişand ser kiryarên dewleta Tirk a dagirker ên li hemberî gelê Kurd li Rojavayê Kurdistanê û diyar kir ku dewleta Tirk bi şer, plan, zexta li ser hêzên navneteweyî û dewletên ku destê wan di aloziya Sûriyeyê de hene, dixwaze Kurdan ji herêmên wan derxîne û wan tune bike.
Salih Gedo da zanîn ku ew dixwazin bi yekrêziya Kurdî li Rojavayê Kurdistanê gelê xwe biparêzin û di nava vê guhertina li Sûriyeyê de bernameya tevgera Kurdî bidin pêş û axaftina xwe wiha domand: “Divê Kurd weke bedenke li Sûriyeyê xwedî roleke taybet be, karibin xwe bigihînin cihê biryarê da ku mafê xwe misoger bikin. Pêwîste di vê rewşa dîrokî de tevgera siyasî ya Kurdî bi kêmanî yekrêziya xwe bi cih bike. Dema em bibin xwedî yek helwestê, wê dostên me jî piştgiriya me bikin û bawerim em ê karibin bigihîjin peymanekê. Dagirkerên Kurdistanê dixwazin gelê Kurd parçe bikin, bi parçebûnê Kurdan lawaz bixin, aliyekî Kurdan têxin xizmeta xwe, lewma pêwîste dijî wê helwest were nîşandan. Divê dualîbûna tevgera siyasî ya Kurdî li Rojavayê Kurdistan nemîne û qedexe be. Pêwîste partiyên Kurdistanî ji bo pêkanîna yekrêziyê alîkar bin û rê bidin ku partiyên li Rojava biryareke xwe ya serbixwe bidin.”
Salih Gedo di dawiya axaftina xwe de bang li tevger û partiyên siyasî yên Kurdî kir ku berjewendiyên gelê Kurd ê li Sûriyeyê daxwaza wan a yekemîn be, bi rihekî kurdewarî û bi yekdestî mafê gelê xwe biparêzin.
Çavkanî: Ajansa Welat