Şaredariya Bajarê Mezin a Wanê ragihand, îdiayên ku dibêjin Hevşaredar Abdullah Zeydan ji kar hatiye dûrxistin û li şûna wî qeymeqam hatiye tayînkirin, ne rast in.
Şaredariya Bajarê Mezin a Wanê, der barê îdiayên ku li ser hin hesabên medyaya civakî hatin parvekirin ku dibêjin Hevşaredar Abdullah Zeydan ji wezîfeyê hatiye girtin û li şûna wî qeyûm hatiye tayînkirin, daxuyanî da.
Di daxuyaniyê de hat got: “Ji hêla hinek hesabên trol û qestî ve li ser bingeha belgeyek xelet, agahiyên ku Hevşaredarê Şaredariya Bajarê Mezin a Wanê Abdullah Zeydan ji kar hatiye dûrxistin û li şûna wî jî qeyûm hatiye peywirdarkirin tên belavkirin. Em radigihînin ku ev agahî ne rast in û belge jî xelet e û em ji gelê xwe dixwazin ku bawerî bi van belavokên xelet neynin.”
Şaredariya Bajarê Mezin a Wanê got: “Divê baş were zanîn ku armanca van belavokên wiha, tevlîhevkirina hişê gel û çêkirina şikê di nîyeta xwedîderketina li îradeya rastîn de ye. Hevşaredarên me li ser karê xwe ne û bi hemû hewl û hêza xwe ve xebatên xwe didomînin.”
Abdullah Zeydan di hilbijartinên 31’ê Adarê de zêdetirî sedî 50 deng wergirtibû û bûbû şaredarê Wanê. Lê bi hinceta ku mafê wî yê beşdarbûna hilbijartinê nîne, pesendname nehatibû dayîn. Piştî xwepêşandanên mezin, komisyona Bilind postê serokatiya şaredarîyê radestî Abdullah Zeydan kir.