Dêrsim de Seyîd Riza û embazê ci Wusênê Seydî, Alîyê Mirzê Sîlî, Hesen Aga, Findiq Aga, Resik Uşên û Hesenê Ivraîmê serrgêra 84. ya dardekerdişê înan de bi panelêkî ameyî yadkerdene.
Rayber û pîrê Dêrsimî Seyîd Riza, Wusênê Seydî, Alîyê Mirzê Sîlî, Hesen Aga, Findiq Aga, Resik Uşên û Hesenê Ivraîmê 15ê teşrîna peyêne ya 1937î de hetê dewleta tirke ra Xarpêt de Meydanê Bugdayî de ameybî dardekerdene.
Platformê Kede û Demokrasî yê Dêrsimî serrgêra 84. ya dardekerdişê înan de bi panelêkî Seyîd Riza, Wusênê Seydî, Alîyê Mirzê Sîlî, Hesen Aga, Findiq Aga, Resik Uşên û Hesenê Ivraîmê yad kerdî.
Panel salona konferansî ya Şaredarîya Dêrsimî de ame kerdene. Nuştox Huseyîn Yilmaz û Nevzat Onaran panel de qisey kerd. Xeylêk temsîlkarê partî û rêxistinanê Dêrsimî zî tewrê panelî bîyî. Prof. Dr. Gulnaze Karatay zî panel de travmayanê peyê Jenosîdê Dêrsimî ser o qisey kerd.
Huseyîn Yilmazî da zanayene ke menga nîsane ya 1937î de tay ferdê keyeyê Seyîd Rizayî Laçînan de pê gulevarnayîşî ameyê kiştene û vat: ''Seyîd Riza û embazê ci nêameyî muhakemekerdene. Ê têna semedo ke vat 'Destê xo medê erd û ziwanê ma' ameyî qirkerdene. Pêro kerdişê ê çaxî plankerde bîyî. Tîya de kîno tarîxî esto ke hema zî dewam keno. Ma wazenê wa dewlete jenosîdî qebul bikera.''
Nuştox Nevzat Onaranî pare kerd ke dewlete qestî ra nameyê Dêrsimî kerdo 'Tunceli' û vat: ''No name şîfreyê kerdişanê dewlete bi. Binê nameyê modernîzekerdişî de bi hezaran merdimî ameyî qetilkerdene û surgunkerdene.''
Prof. Dr. Gulnaze Karatay ard ziwan ke Jenosîdê Dêrsimî mezgê ciwanan de sey travma ciwîyeno û vat: ''Cigêrayîşî mojnenê ke bi taybetî şahîdan û mexdûranê jenosîdî de travma, stres, depresyon, nêweşîyê kronîkî, kanser zaf ê. Semedo ke ma rê firsendê weşbîyayîşî nêdîya ma nê travmayî antî. Goreyê doneyan waqayê xokiştişî tewr zaf Dêrsim de qewimîyenê. No zî netîceyanê travmaya jenosîdî ra yew o.''