Civîna çaralî ya cîgirên wezîrên derve yên Sûriye, Tirkiye, Îran û Rûsyayê li Moskoyê ji bo gotûbêjkirina pêwendiyên navbera Şam û Enqereyê de bûye cihê girîngîpêdana hemû aliyên pêwendîdarî dosyeya Sûriyê.
Ji Misrê, Serokê Şepêla Surî ya Çaksaziyê Şikrî Şêxanî, ku beşek ji Encûmena Sûriyeya Demokratîk e ji Tora Medyayî ya Rûdawê re got dibe ku ev civîn rê li pêş civînekê di navbera Esed û Erdogan de xweş bike.
Serokê Şepêla Surî ya Çaksaziyê Şikrî Şêxan got "Der barê civîna îro, di navbera cîgirên her çar wezîrên derve yên Rûsya, Sûriye, Tirkiye û Îranê de, ew tenê ji bo anîna pêş ya hersu rejîmên Sûriyê û Tirkiyê ye. Herdu rejîm di rewşeke wêran a aborî, siyasî û civakî de ne. Piştî hilbijartinan, rewş dê zelaltir bibe û dibe ku civîneke lûtkeyê di navbera Erdogan û Esed de bê kirin."
Serokê Şepêla Azadî ya Kurdistanî, Siyamend Haco ji Tora Medyayî ya Rûdawê re behsa bandora jihevnêzîkbûna Tirkiye û Sûriyê li ser rewşa navçeyên Rojavayê Kurdistanê kir.
Serokê Şepêla Azadî ya Kurdistanî Siyamend Haco dibêje "Eger lihevhatinek di navbera hikûmeta Tirkiyê û rejîma Sûriyê de çêbibê dê bandoreke mezin li Kurdistana Sûriyê de hebe, bandoreke mezin li ser wê herêma ku din bin kontrola Hêzên Sûriya Demokrat û PYDê de hebe. Em dizanin ji aliyekî ve Efrîn û Serê Kaniyê ku lihevhatinek çêbû, wê nîzam vegere vê herêmê. Ev şertekî nîzamiyê ye eger têkilî bi Sûriyê re bike yanî lihevhatinek çêbibe, şertê wan ew e ku hêzên Tirkiyê xwe vekişîne û hêzên Tirkiyê xwe vekişandin wê alîkariyên ji aliyên Tirkiyê ve werin sekinandin."
Çavkaniyên nêzîkî hikûmeta Sûriyê aşkere dikin ku şanda Sûrî 3 xalên sereke pêşkêş kirine ku rêzgirtina Tirkiyê li serweriya Sûriyê, xişteyeke demî ji bo vekişandina ji nav xaka Sûriyê û rawestandina piştevaniya grûpên opozisyona Sûriyê ye.
Rûdaw