Çavdêriya Mafên Mirovan li Sûriyê (SOHR) ragihandin ku di şer û pevçûn û êrîşên li berava Sûriyê û dorûbera parêzgeha Laziqiye rû dane de, 120 kes hatine kuştin. Herwiha xwendekareke ji Rojavayê Kurdistanê Şînda Keşo jî di bûyeran de hatiye kuştin.
Li gorî dîmenên belav bûne, tenê li gundê Muxtariye yê girêdayî parêzgeha Laziqiye bi dehan cenazeyên bi cilên sivîl xuya dikin.
Li gorî çavkaniyan, çekdarên ku tên texmînkirin girêdayî desthilata Şamê ne komkujî li dijî Elewiyên gundê Muxtariye pêk anîne.
Herwiha kkeça bi navê Şînda Keşo ya ji Qamişloya Rojavayê Kurdistanê ku li zanîngeha Laziqiye beşa bijîşkiyê dixwend jî di encama gulebarana bêserûber a bajarê Laziqiye de jiyana xwe ji dest da.
Xwendekarên zanîngeha Laziqiye bi daxuyaniyekê xwestine, Rêveberiya Xweser ji bo derxistina wan a ji Laziqiyê bibe alîkar.
Rêveberê SOHR Ramî Ebdûlrehman eşkere kir, heta niha 120 kes di şerê di navbera hêzên desthilata nû ya Şamê û komên çekdar de hatine kuştin.