Li gor çavkaniyên xwecihî Artêşa Tirkiyê û grûpên çekdar ên girêdayî wê bi çekên giran û topxaneyan, gundên Bînî û Til Xabûr ên ser bi navçeya Şêrawa ya li başûrê Efrînê topbaran kirin.
Derbarê zerar û ziyanan de, heta niha ti zanyarî nehatine belavkirin.
Topxaneya Artêşa Tirkiyê berî 20 rojan jî gundên Birc Qas, Meyase, Ziyaretê û Heriş Soxanekê topbaran kiribûn û zerareke zêde gihiştibû wan gund û navçeyan.
Gundên di destê hêzên Kurdî de
Ev gundên hatine topbarankirin nêzikî Nubul, Zehra û Til Rifet in ku herêma Til Rifet û çend gundên wê deverê niha di kontrola YPGê de ne û ji rojhilat, bakur û rojava ve ji aliyê hêzên Tirkiyê û çekdarên opozisyona Sûriyê û ji başûr ve jî ji başûr ve jî ji aliyê hêzên Sûriyê ve dorpêçkirî ne.
Piştî êrişa Tirkiyê bo ser Efrînê hejmareke zêde ya xelkê Efrînê koçberî wê deverê bûne û niha di 5 kampan de dijîn.
Til Rifet 25 kîlometran dikeve başûrê rojhilatê Efrînê û YPGê ew bajarok di Sibata 2016an de ji destê çekdarên opozisyona Sûriyê derxistibû.
Girîngiya Til Rifetê ji wê yekê tê ku li devera Şaehba bajarokê herî nêzîkî sînorê Tirkiyê ye ku hêzên YPGê lê hene, herwiha Firokexaneya Minnix a Leşkerî jî li bakurê rojavayê Til Rifetê ye ku di kontrola hêzên Kurdî de ye.
Dagirkirina Efrînê û binpêkirinên li dijî Kurdan
Artêşa Tirkiyê û grûpên çekdarên tundrew ku ser bi opozisyona Sûriyê ve ne û Tirkiye piştevaniya wan dike, roja 20ê Çileya 2018an êrişeke berfireh a bejayî û asmanî bo ser Efrînê dan destpêkirin ku di bin kontrola hêzên Kurdî de bû.
Piştî wê êrişa berfireh a bi her cor çekên giran, bajarê Efrînê roja 18ê Adara 2018an ket destê artêşa Tirkiyê û grûpên çekdar.
Di encama êrişên giran û ketina bajêr bo destê çekdaran de, bi sed hezaran xelkê Kurdan mal û warên bicî hiştin û ketin ser rêyên koçberiyê.
Herwiha ji wê roja ku Efrîn ket bin dagirkirina artêşa Tirkiyê û komên çekdar ên opozisyona Sûriyê, binpêkariyên li hember welatiyên Kurd li wê herêmê berdewam in.
Heta niha ji aliyê rêxistinên xwecihî û navdewletî ve bi sedan binpêkariyên li dijî xelkê sivîl hatine tomarkirin ku ji aliyê çekdarên girêdayî Tirkiyê ve hatine encamdan.
Rûdaw