Îranê îro sibehê li Girtîgeha parêzgeha Urmiyeyê ya li Rojhilatê Kurdistanê 5 girtî îdam kirin.
Li gorî zanyariyan, 4 ji wan girtiyên ku hatime îdamkirin Kurd in û kesek jê jî Tirk e.
Rêxistina Mafên Mirovan a Hengawê eşere kir ku yek ji girtiyên hatiye îdamkirin jî jin e.
Hengawê di raportekê de ragihand ku li Girtîgeha Urmiyê cezayê îdamkirinê ya ser 5 girtiyan hatiye bicîkirin.
Li gorî Hengawê 5 kesên ku cezayê bidarvekirin hatiye bicihkirin ev in:
Perwîn Mûsewî 50 salî ye Tirk e û xelka bajarê Meraxê ye, Mesnûr Nasirî 45 salî ye xelkê Bokanê ye, Yûsif Seidî Çêhre 32 salî ye, Ramîn Lewend 27 salî û Perwîz Qasim 35 salî ye hersê jî xelkê Urmiyeyê ne.
Li gorî zanyariyan Hengawê gelek tohmet li ser wan 5 girtiyan hebûye.
Ji ber tohmeta “bazirganiya madeyên hişber” cezayê îdamê li ser wan hatibû birîn û 2 roj beriya niha ji odeya takekesî hatibûn veguhastin.
Hengawê amaje bi wê yekê jî kir bavê Perwîz Qasimî, Salih Qasimî û birayekî Ramîn Lewendî jî bi tohmeta bazirganya madeyên hişbir hatibûn îdamkirin.
Li gorî Hengawê herwiha Perwîn Mûsewî jî di girtîgehê de bi nexweşiya pencşêrê ketibû û rewşa tenduristî wî xirab bûbû.
Îranê 3 rojan berê jî li Kerec û Îlamê 6 girtiyên Kurd îdam kiribûn.
Hejmara îdamkirina Kurdan zêde dibe
Amnesty Internationalê beriya bi mehekê di raporekê de eşkere kiribû ku Komara Îslamî ya Îranê dest bi desteserkirin û îdamkirina neteweyên Kurd, Belûc Ereb û Azerî kiriye.
Li gorî Amnestyê sal bi sal hejmara girtî û îdamkirina Kurdên Yarsan û Kurdên Sunne jî zêde bûye.
Par 151 Kurd hatin îdamkirin
Îran yek ji wan welatan e ku rêjeya îdamê lê gelekî zêde ye.
Li gorî rêxistina Mafên Mirovan a Îranê, di mehên borî de bi hinceta mijarên siyasî, qaçaxçîtiya madeyên hişbir û kuştina bi qestî 171 kes hatine îdamkirin.
Rêxistina Mafê Mirovan a Hengawê jî di raporekê de eşkere kiribû ku sala 2023yan li Îran û Rojhilatê Kurdistanê bi giştî 823 girtî hatine îdamkirin ku 151 ji wan girtiyan Kurd in.
Li gorî rêxistina AMNESTY Internationalê di lîsteya herî zêde ya îdamkirina girtiyan a welaten de Çîn di rêza yekem û Îranê jî di rêza duyem de cih digire.