Nîgarferhengo ke bi Kurmanckî û Kirmanckî ameyo hedrekerdiş, hetê Weşanxaneyê Morîyî ra ameyo weşanayîş.
Mem Bawer û Ridwan Polatî dîwês serrî cuwa ver Weşanxaneyê Hîva awan kerd û înan xeylê kitabê serkewteyî weşanayê. Dima înan Weşanxaneyê Morî awan kerd û reyna bi keda nê weşanxaneyî kitabê domanan ê xeylê rindek û serkewteyî yene weşanayîş.
Bi Kurmanckî û Kirmanckî Nîgarferhengêk
Weşanxaneyê Morîyî nîgarferhengêko bi Kurmackî û Kirmanckî amade kerdo. Ferheng hetê Ridvan Polatî ra hedre bîyo. Kirmanckîya nîgarferhengî hetê Uxur Sermîyanî ra ayeyo hedrekerdiş. Nîgarferheng 64 beşan ra ameyo pê. Raşta zî tedeyîya nîgarferhengî hîra û reng bi reng a. Uxur Sermîyanî wexto ke çekuyê nîgarferhengî weçînayê, dîqetê xo dayo serê meseleyanê muhîman. Çekuyê ke Kirmanckîya ferhengî de ca gênê fekanê cîya-cîya minqiqayanê Kirmancan ra ameyê weçînayîş. No zî nîgarferhengî kerdo hîra û dewlemend. Reyna çekuyê Kirmanckîyî goreyê cinsîyetanê xo ameyê dîyarkerdiş. Peynîya çekuyanê nêrîyan de herha (n)yî, peynîya çekuyanê makîyan de herfa (m)yî ameyê ronayene. No xususîyet zî musayîş û perwerdeyî asan keno. Reyna qismê tedeyî de xususen derheqê çekuyanê Kirmacnkî de malûmatê bingeyinî ameyê dayene. Nîgarferhengî de çekuyê Kurmanckîyî bi rengê sîyayî, çekuyê Kîrmanckîyî zî bi rengê sûrî ameyê nîşandayene. Nîgarê ferhengî zî hetê Ercan Altuntaşî ra ameyê hêzkerdiş.
Materyalê Perwerdeyî
Serranê peyênan de musayîşê Kurdkî rê eleqayêko pîl esto. Dersê Kurdkî hem kursanê taybetan de hem zî mektebanê dewlete de yene dayene. Dersa weçînitî ya Kurdkî serranê peyênan de hetê xeylê domananê Kurdan ra yena weçînayîş. Çi heyf ke perwerdeyê Kurdkî de kêmanîya materyalanê perwerdeyî esta. Ez hêvî kena no nîgarferhengo ke bi Kurmanckî û Kirmanckî ameyo hedrekerdiş do seba mamosteyanê Kurdkî bibo hetkarêko pîl. Ma ganî nê nîgarferhengî birasnê domananê Kurdan û pê zerra înan a tenike şa bikerê.