Temsîlkarê Weşanxaneyê Soro ke 9 kitabê şîîran ê Arjen Arîyî reya verêne pîya weşaneyî vat bi hîstenikîya vîrameyîşê Arjen Arîyî ma keyeyê ey reyde bi kede kitabî amade kerdî.

Set 9 kitabanê şîîrî yê Arjen Arîyî ra yeno pê. Setê Arjen Arî yo ke şaîrêko muhîm ê edebîyatê Kurdkî yê modernî yo, mabênê 28 Êlule û 6'ê Teşrîna Verêne de Amed de Fûarê Kitaban ê 7'in ê TUYAP'î de do bireso destê wendoxan.

Şaîr Arjen Arî 30'ê Teşrîna Verêna 2012'î de nêweşîya rîşa merdimwere ra wefat kerd. Nuşte û şîîrê Arîyî 1979'î ra nata Swêd, Tirkîya û Kurdistan de zafê kovaranê sey Berbang, Kurdistan Pres, Nûdem, Çira, Rewşen, Nûbihar, Gulîstan, Kevan, Tîroj, Peyv, Nûbûn û Karwanî de weşanîyayê. Arîyî Welat û Yenî Ozgur Polîtîka de zî nuştêne. Heta nika 15 kitabê Arjen Arîyî ke înan ra 9 kitabê şîîrî yê weşanîyayê. Tayê şîîrê Arîyî heta deyîrbazanê Kurdan ra sey deyîran ameyî viraştene.

Temsîlkarê Sorî Ronahî parbe kerd ke wextê prosesî yê çapkerdişê kitaban de keyeyê Arjen Arîyî reyde pîya xebitîyayê, "Endamê keyeyî seba ma girîng bîyî. Keyeyî waşt ke kitabê şaîrêko sey Arjen Arîyî biprofesyonelî bêrê çapkerdene. Xora zafê weşanxaneyî destûr nêdanê naye. La ma zanayêne ke keyeyê Arjen Arîyî na babete de zaf hîstenik o destpêkî ra heta peynîye ma keye reyde bikoordîne xebitîyayê."