Partîya Welatparêzanê Kurdistanî (PWK), şandê 12.10.2024î de Dîyarbekir de, Şewa Pîrozkerdişê Yewserrîya PWK viraşt. Şewa Pîrozkerdişê Yewserrîya PWK bi xeberdayîşê endamê Meclîsê Partî yê PWK Mehmet Selîm Ûzûnî, dest pêkerd. No teksto kirdkî/zazakî yo ke şima cêrde vênenî, xeberdayîşê Mehmet Selîm Ûzûnî yo.

Mêmanê erjayeyî,

Temsîlkarê partîyanê sîyasî, dezgeh û sazgehanê sivîl û demokratîkan,

Şexsîyetê qedirberzî!

Dost û embazê delalî,

Ez nameyê Partîya Welatparêzanê Kurdîstanî (PWK) ser o şima rê bi rêz û hurmet selamî kena. Şima xeyr ameyî Şewa Piştîdayîşê Yewserrîya Partîya Welatparêzanê Kurdîstanî. Şima sare û çimanê ma ser ameyî!

Mêmanê erjayeyî,

Dost û embazê delalî,

Ez zaf şa û bextewar a ke ewro na salone de, reyna bi ziwanê mayo şîrîn û delal, xîtabî şima kena. Kongreya awankerdişê partîya ma mabênê 9-10î îlone 2023 de Dîyarbekir de virazîya. Kongreya partîya ma bi qisêkerdişê kirdkî/zazakî dest pêkerd. Bêguman na yew gama muhîm bî. Gelo çira gama muhîm bî? Belê, gamêka muhîm a, çunkî, tarîxê Kurd û Kurdîstanî de reya verêna ke yew partîya kurdan kongreya xo bi kirdkî/zazakî dana destpêkerdiş. Ewro zî, na salone de, ma reyna bi kirdkî/zazakî dest bi kombîyayîşê xo kenî. Reyna zî ez zaf keyfweş û bextewar a ke, Partîya Welatparêzanê Kurdîstanî no şeref û paye dayo mi ke ez bi kurdkîya qedîm yanî bi zazakî xîtabê şima kena. Kirmanckî/kirdkî/dimilkî yanî zazakî parçeyek ziwanê kurdkî yo. Şima zanî kurdkî, yanî ziwanê miletê kurdî, ziwanêko qedîm û dewlemend o. Kirdkî/zazakî mîyanê lehçeyanê kurdkî de lehçeya tewr qedîm a. La malesef kirdkî/zazakî heta ewro zaf îhmal bîya.

Seke şima zanî, yew serre cover, 9 û 10î îlone 2023 de, paytextê Kurdîstanî Dîyarbekir de, Partîya Azadîya Kurdîstanî (PAK) û Tevgera Demokratîk a Kurdîstanî, Kongreya xoya Yewbîyayîşî viraşt û Partîya Welatparêzanê Kurdîstanî (PWK) amey ronayîş. Ewro ma bi munasebetê pîrozkerdişê serrgêra ronayîşê PWK reyna na salone de amey tê het.

Wa Serrgêra Partîya Welatparêzanê Kurdîstanî (PWK) pîroz bo!

PWK miletê kurdî û heme xelqê Kurdîstanî rê pîroz bo!

Mêmanê ezîzî,

Serekê Partîya Welatparêzanê Kurdistanî (PWK) rêzdar Mustafa Ozçelîk do şima rê derg û dila hedef, amanc û sîyasetê PWK ser o malumato hîra bido. Ney ra ez xeberdayîşê xo derg nêkena. La ez wazena tîya de derheqê çend xususîyetanê partîya ma de melumat bidî şima.

Partîya ma bi nameyê xo, bi programê xo, bi nîzamnameyê xo, bi amblemê xo, bi rêxistinîya xo, bi fikr û perspektîfanê xo her het ra partîyeka newe ya. Partîya ma, Kurdîstanê Vakurî û Tirkîya de çarekerdişê persa kurd û Kurdîstanî xo rê kerda amanc û semedê caardişê heqê tayînkerdişê qederê xo yê miletê kurdî (sey federasyon, konfederasyon, xoserîye) xebat kena, mucadele dana.

PWK, milî, demokratîk, sivîl, sekuler, îdealîst û fedakar yew partî ya. Çunkî, PWK hîtabî yew sinif, yew tebaqa, yew zumre, yew mintiqa, yew dîn, yew mezheb, yew ziwanî nikena û tek yew îdeolojî ser o hereket nikena. PWK, zaf vengin, zaf rengin û kîtlewî yew partî ya.

Mêmanê ezîzî,

Dost û embazê delalî,

Kurdî, bi hezaran serrî yo ke Rojhelato Mîyanên û Mezopotamya de ciwîyenî. Ziwanê kurdkî bi heme lehçeyanê xo ziwanêko qedîm û dewlemend yê famîlyaya ziwananê Hînd-Ewropa yo. Miletê kurdî bi ziwan, tarîx, kultur, urf û adetanê xo tarîx de û ewro komelêko biîstîqar o; grûbanê etnîkan yê bînan reyde cayo ke tira Kurdîstan vajîyeno de ciwîyeno. Kurdîstan de tewrê miletê kurdî cîya-cîya etnîsîte, dîn û mezheban ra sewbîna mînorîteyê bînî zî estî. Partîya ma sey armenî, asurî-keldanî, ereb û azerîyan heme şarê ke Kurdîstan de ciwîyenî, seba ke biresê heqanê xoyê nasnameyê etnîkî, bawerî û demokratîkan û Kurdistan de azadane biciwîyê, mucadele kena.

Partîya ma, verba/duştê zîhnîyetê “yew milet, yew dewlet, yew ale, yew ziwan, yew dîn, yew mezhebî, yew partî, tek yew îdeolojî” mucadele kena. Heqê her kulturî est o ke halê xo yê xozayî de biciwîyo, aver şêro û bêro pawitiş. Partîya ma, înkarkerdiş û asîmîlekerdişê her kulturî suc vênena. Azadî, demokrasî û aştîye garantîya bingeyî ya eynî erdî ser o pîyaciwîyayîş û pêkerdişê heme şaran û kulturan ê.

Partîya ma, heme ziwan, lehçe û kulturê ke Kurdîstan de est ê seyyewbînî hesibnena. Estbîyayîşê mînorîteyan, dînan, mezheban û lehçeyan û heq û azadîya înan qebûl kena. Semedo ke her ziwan û bawerî her warê ciwîyayîşî de bê astengî biciwîyê xebitîyena û çarçewaya huqûqê cîhanşumulî de garantîkerdişê nînan mudafa kena.

Mêmanê hêcayî,

Dost û embazê delalî,

Ez tîya de bi taybetî wazena yew nuqteya muhîm ser o vinderî. Seke şima zanî Kurdîstan de di lehçeyê kurdkî estî. Kurmanckî û kirdkî/zazakî. Programê Partîya Welatparêzanê Kurdîstanî de ameyoxî ziwanî kurdkî ser o wina yew made esto:

“Kurdîstan de kurdkî do bi her di lehçeyanê xo (kurmanckî û kirdkî/zazakî) biba ziwano resmî. Herêmê ke kurmanckî tede zaf yena qiseykerdiş do nê herêman de kurmanckî lehçeya sereke ba la sîstemê perwerde û dezgehanê dewlete de musayîşê kirdkî zî do mecbûrî bo. Herêmê ke kirdkî/zazakî tede zaf qisey bena do nê herêman de kirdkî lehçeya sereke ba la sîstemê perwerde û dezgehanê dewlete de musayîşê kurmanckî zî do mecbûrî bo.”

Mêmanê erjayeyî,

Dost û embazê delalî,

Goreyê partîya ma ewro Kurdîstanê Vakurî de kulturê ma û bi her di lehçeyanê xo (kurmanckî, kirdkî/zazakî) ziwanê kurdkî binê tehlukeyêkê girdî de yê. No war de partîya ma, Kurdîstanê Vakurî û Tirkîya de, ewro ra û bi lezgînî semedê awankerdiş û xurtkerdişê dezgeh û sazgehanê milî, komelkî û meslekîyan, semedê pawitiş û averberdişê ziwanî û kulturî xebitîyena. Partîya ma na bawerî de ya ke semedê pawitiş û averberdişê ziwanê kurdkî ganî tedbîrê acîlî bêrî girewtiş û ganî nê warî de bi acîlî tayê projeyî bêrî amadekerdiş. Partîya ma piştî dana dezgeh, sazgeh û kesanê ke nê waran de xebitîyenî. Partîya ma keye, cayê karî û bazar de û têkilîya bi dezgehanê dewlete de timûtim qiseykerdişê kurdkî teşwîq kena. Semedê weşkerdiş û averberdişê kulturê kurdkî akerdişê kurs, komele, weqf û wendegehan teşwîq kena û nê warî de piştî dana xebatan. Partîya ma, semedo ke ziwanê kurdkî resmen bibo ziwanê perwerdeyî û tewrî tirkî ya bibo ziwano resmî û no resmîyet bi Qanûnê Bingeyî û qanûnanê bînan bêro garantîkerdiş xebat kena û mucadele dana.

Mêmanê erjayeyî,

Dost û embazê delalî,

Sîyasetê kolonyalîstî, înkar, îmha, tehcîr û asîmlasyonî yê ke Dewleta Komara Tirkîya hetanî ewro domnayê, awanîya neteweyî, demografîk û komelkî ya Kurdîstanî ser o tesîrêko zaf xurt kerdo û bîyo sebebê texrîbatanê girdan. No sîyaseto edetî yo ke dişmenîya miletê kurdî ser o awan bîyo, şertanê ewroyî de hîna xurt bîyo û dewam keno. Dewleta Komara Tirkîya, goreyê nîzamê huqûqî yê xo û qanûnanê xo yê mewcûdan zî hereket nêkena. Îdarekerdoxanê îdareyanê mehelîyan yê Kurdîstanî û parlamenteran berteraf kena, bi tayînkerdişê qeyyûman îradeyê bi milyonan raydayoxan betal kena. Partîya ma beyan kena ke: Dewleta Komara Tirkîya mecbur a goreyê qaydeyanê peymananê mîyanneteweyîyan û huqûqî hereket bika. Heq û prensîpê weçînayîş û xweçînîyayîşî, dinyaya hemdeme de heq û prensîpanê bingeyênanê winasîyan yê demokrasî ra yê ke çinê hesab nêbenê, fek ci ra veranêdeyêno û esla dewr nêbenê.

Bêguman rewşa nikayine tena zerar nêdana miletê kurdî û hetanê etnîk û dînîyan yê Kurdîstanî, hem sere de zerar dana şarê tirkan hem zerar dana pêroyê şaranê bînan ê ke Tirkîya de ciwîyenê hem zî erjanê demokratîkan. Partîya ma beyan kena ke, semedo ke no texrîbat hîna zaf nêbo û hem heme heqê însanî yê bingeyênî yê miletê kurdî hem zî heqê heme şaranê bînan yê Kurdîstanî bêrî temînkerdiş, Tirkîya de zemîneyêka demokratîke ca bigîra û na zemîne de problemî bi rayîr û metodanê aştîye û demokratîkan çare bibê, ganî telebê cêrênî bêrî ca. Partîya ma semedê naye xebitêna û mucadele kena.

Partîya ma, na bawerîye de ya ke hemkarîye û platformê ke telebanê acîlan yê miletê kurdî ser o teşkîl bibê, hem semedê caardişê îttîfaqanê demokratîkanê neteweyîyan yê demdergan hem zî demo kilm de semedê çarekerdişê persa kurd û Kurdîstanî, do bibê bingeyêko munasib û gamêka muhîme. Ganî partî û rêxistinê sîyasî, derûdor, kesê qedrberzî, dezgehê sîvîl û demokratîkî yê ke Kurdîstanê Vakurî û Turkîya de est ê semedê nê telebanê acîlan bêrî têhet û yew platformê temsîlkar yê kurdan yê hemparî teşkîl bikê ke no platform hem muzakereyanê mîyanê kurdan de hem zî muzakereyanê kurdan û muxatabanê înan de bibo teref. Partîya ma, do semedê teşkîlkerdişê nê platformî bixebitîya.

Mêmanê erjayeyî,

Embazê delalî,

Milet, welat, ziwan û kulturî ma (yanî miletê kurdî, welatî ma Kurdîstan, ziwanê ma kurdkî, tarîx û kulturî ma) verê heme çî yenî.

Reyna şima pêron rê selam û hermet kena û nameyê Partîya Welatparêzanê Kurdîstanî ser o şima rê zaf teşekur kena.

Şima heme weş û war bên!

Wa biciwîyo miletê Kurdî, wa biciwîyo Kurd û Kurdîstan!

Dîyarbekir, 12.10.2024

Mehmet Selîm Uzun