Nika wextê sîrê koyan ke qezayanê Pulur û Pîlemurîye yê Dêrsimî û Koyanê Muzirî de reseno yo. Nê tewirê sîrî xo bi xo vejîyeno wisar ra heta aşma Tebaxe resayîşê sîrî dewam keno. Toximê sîrî aşma Tebaxe rişîyeno der û dorî. Cok ra mabênê Tebaxe û Teşrîna verêne de yeno arêdayene.

No sîro ke koyan de reseno, kîloyê ci 100 TL ra yeno rotene labelê reyna zî hetê xeylê kesan ra yeno tercîhkerdene. Şarê herêmî dîyar keno ke eke rişnayîşê toximî ra ver bêro arêdayene, o wext sîr çin beno. Sîrê Koyan ra bi Latînkî ‘Allîum Tuncelûanum’ yeno vatene û par ameyo tescîlkerdene.

Mûrat Kasûno ke sîrê koyan arê dano û roşeno va: “Eke sîrê koyan wextê xo de nêro arêdayene, zirar vîneno û beno ke biqedîyo. Seba ke xo bi xo newe keno, eke wextê xo de nêro arêdayene, texrîb beno. Gere sîrê ke toximê xo nêrişnayî, nêro arêdayene. Ancax ê ke toximê xo rişnayî arê dîyenî. Sîrê koyan her derdî rê derman o. Ez serê sibayan şona koyan û çend kilo arê dana. Her çiqas ke vay o zî, zaf yeno tercîhkerdene. Bi taybetî nêweşîyanê qesebaya sîyaye û loqleyan rê şîfa yo.”