Serekê Baroyê Dîyarbekirî yo verên Tahîr Elçî, verê Minareya Çarlinge ke uca de amebi kiştiş de ame yadkerdiş. Avukatê Baroya Dîyarbekirî û temsîlkarê partîyasê sîyasîyan beşdarê yadkerdişî bîyî.

Avukatê Baroya Dîyarbekirî, bi minasebetê serrgêra hewtine ya wefatê Tahîr Elçî de, verê Edlîyeya Dîyarbekirî de ameyî yewca û uca ra hetanî Minareya Çarlinge rayşîyayîş kerd.

Rayşîyayîş de sloganê “Tahîr Elçî Rûmetê Ma Yo” ameyî vatene. Serekê Baroya Dîyarbekirî Nahit Erenî yadkerdiş de qiseykerdişêk kerd û wîna va “ Serra 2015î de na roje, Tirkîya de demêko tarî dest pêkerd. O wext newe ra semedê meseleya Kurd polîtîkayê asayîşî dest pêkerdî. Serê nê cînayetê tarî ra 7 serrî vîyartî. La faîlê nê cînayetî hîna zî aşkere nêbîyê û nêameyê cezakerdiş.”

Qiseykerdişan ra badê pey cayo ke Tahîr Elçî amebi kiştiş de qerenfîlî ameyî ronayîş.