Ma sey TDK-TEVGER û PAK, bi keyfweşî û bi zerrîweşî wazenê şarê xo agahdar bikê ke ma qirar dayo ke ma do mîyanê yew partî de yewitîya xo ya rêxistinî û sîyasî viraşta.

TDK-TEVGER û PAK êlula 2023î de do kongreya xo ya yewitîye virazê û do sey partîyêka newîye meydanê sîyasî yê dewaya azadî, xelasîye û xoserîya Kurdistanî de xebatanê xo biramnê. TDK-TEVGER û PAK semedo ke vernîya yewitîya sîyasî akerê no serrîyo ke mîyanê dîyalog û xebatêka hîraye de yê.

Badê kombîyayîş û xebatanê pîya, deklerasyonê sîyasî yo wertax û taslaqê programî û raporê xebate yê ke hetê komîsyona wertax a TDK-TEVGERî û PAKî ra ameyê hadrekerdiş, endam û hetgiranê PAK û TEVGERî dir ameyê parekerdiş. Endam û hetgirê PAK û TEVGERî pa fikir û pêşnîyazanê xo yê pozîtîf, xabata yewitîya sîyasî û rêxistinî qebûl kerdê û paştîdayîşêko pîl dayê prosesê yewitîye.

TDK-TEVGER û PAK ke do pîya partîyêka newî awan bikê, xo bi tu rêxistin û fraksîyonanê siyasîyan de name nêkenê; ê xo dewamîya dewaya azadî, xelasî û xoserîya Kurdistanî vînenê. Ancî; ê xo dewamîya heme têkoşîn, xebate, kede û ercanê milî, demokratîk, niştimanî yê Kurdistanî vînenê.

Bi na hişmendî û bi na bawerî, TDK-TEVGER û PAK vanê, Bakurê Kurdistanî de lazimtîya yewîye esta, heme partî, hereket, rêxistin, grûp û kesayetê ke bername, fikrê înan ê sîyasî, fikrê înan ê derheqê şiklê xebate û rêxistinî de seypê yê, nêzdîyê yewbînan ê, ganî yewitîya xo ya sîyasî û rêxistinî bîyarê ca. Yewitîya TDK-TEVGER û PAKî zî berhem û nîşanê na hişmendî ya, beşêkê caardişê na lazimtî ya.

Awankerdişê partîyêka wînayêne, helbet ke lazimtîya hemkarî û tifaqê neteweyî, demokratîk nêwedareno. Hemkarî û tifaqê neteweyî, demokratîk yê ser prensîbê neteweyî, Kurdistanî ke bêrê awankerdiş lazimtî û wazîfeyêkê ma yo verên yo milî yo. La aşkereyo ke, Bakurê Kurdistanî de partîyêka xurte, qefleyî, milî, demokrat, azadîwaşt, Kurdistanî do awankerdiş, rayberdiş û dewamîya platform, hemkarî, tifaq û bi pîya xebatê hempar yê milî, demokratîk zî bibo bingehêko esasî.

Bêgûman, lazimtîya yewitîya sîyasî û rêxistinî ya partî, hereket, rêxistin, grûp û kesayetê milî, demokrat, azadîwaşt, kurdistanî yê ke bername û fikrê înan ê sîyasî ke seypê yê, nêzdîyê yewbînan ê, bi yewitîya TDK-TEVGER û PAK peynî nêbo. Partîya ke do bi yewîtîya TDK-TEVGER û PAKî bêro awankerdiş zî her qonax da amade ya ke bi partî, tevger, rêxistin, grûbê sey yewbînî, nêzîdîyê ci ra yewitîta sîyasî û rêxistinî bîyare ca.

Bi na hişmendî, ma sey TDK-TEVGER û PAK venga heme siyasetmedar, derdor, roşinvîr û welatperweranê kurdistanî yê sey ma, nêzîdîyê ma fikrîyenê ke wa teberê nê prosesê yewitîya sîyasî û rêxistinî ya semedê ronayîşê partiyêka newî ya neteweyî, demokratîk, azadîwaşt, Kurdistanî, meşrû, legal û qefleyî de nêmanê; bi beşdarî, helwest, waştiş û pêşnîyazanê xo mîyanê ronayîşê partîyêka wîna hîraye û dewlemend de ca bigîrê. Bênê ma pîya semedê xurtkerdiş û averberdişê xoserî û xilasîya neteweyî û demokratîk û serkewtişê armancê nîkayî na gama tarîxî bierze!

Tevgera Demokratîk a Kurdistanî (TDK-TEVGER)

Partîya Azadîya Kurdistanî(PAK)