Navenda Nûçeyan- Nîqaşên li ser ji nû ve kombûna Kongreya Neteweyî ya Kurd berdewam dikin. Tê çaverêkirin ku partî û rêxistinên Kurd û Kurdistanî yên Bakûr di serê meha Kanûnê de careke din serdana Herêma Kurdistanê bikin û hevdîtinan pêk bînin. Parlementerê HDP'ê Îmam Taşçier got; hemû hêzên cîhanî qala Kurdan dikin lê belê divê Kurd jî wekî 2013'an careke din bicivin û di cîhanê de xwedî gotineke bihêz bin. Serokê Partîya Sosyalîst a Kurdistanê PSK'ê Mesûd Tek jî got; kombûna Kongreya Neteweyî ya Kurd daxwaza hemû alîyên Kurdan e lê belê sîyaseta HDP'ê û Qendîlê li pêşîya Kongreya Neteweyî asteng e.

Bi hewla sîyasetmedarên Kurd, xebatên ji bo ji nû ve kombûna Kongreya Neteweyî ya Kurd  berdewam dikin. Di van rojên dawîn de li Dîyarbekirê di nava HDP'ê û hevgirtîyên wê û partîyên Kurdî de hevdîtin tên kirin. Parlementerê HDP'ê yê Dîyarbekirê Îmam Taşçier balê dikişîne ser êrişên li ser Kurdan û dibêje; heger di demeke ku Kurd di rojeva sereke ya cîhanê de cih  digirin de yekitîya Kurdan pêk were dê Kurd bikaribin destkeftîyên xwe biparêzin.

Parlementerê HDPî Îmam Taşçier dîyar kir: "Îro roj roja Kongreya Neteweyî ya Kurd e, îro roj roja yekitîya Gelê Kurd e. Li Iraqê di navbera hikûmeta Bexda û Kurdan de kêşe hene. Li Rojavayê Kurdistanê di navbera Şam û Rojava de pirsgirêk berdewam dikin. Li bakûr jî pirsgirêkên wan hene, nasnameya Kurdan tune ye; nikarin bi zimanê xwe perwerdehîyê bibînin. Li Rojhilat Kurd nikarin nûnertîya xwe bikin. Heger Kurd werin li hev û din rûnin dê pêşketinan bidest bixin."

Li çar alîyên Kurdistanê ji hemû alî û nêrînan cûda Kurdan bertek nişana êrişên Tirkîyeyê bo ser Rojavayê Kurdistanê da. Heman helwesta neteweyî di pêvajoya Referanduma Serxwebûna Kurdistanê de jî hatibû nîşan dan. Her dîsa li beramberî helwesta Bexda, Şam û Tehranê mijara Kongreya Neteweyî rojev germ kir. Li gorî nirxandina Serokê Giştî yê Partîya Sosyalîst a Kurdistanê Mesûd Tek, yekitîya neteweyî ya Kurd nebe nabe, lê di şert û mercanê îroyîn de zehmet e. Tek rexneyan li sîyaseta HDP'ê û Qendîlê jî dike dibêje; divê aktorên maqûl di nav vê xebatê de cih bigirin.

Serokê Giştî yê PSKê Mesûd Tek dibêje: "Ji berîya her tiştî divê di her beşên Kurdistanê de partîyên Kurd û Kurdistanî li hev bin da ku rê ji bo Kongreya Neteweyî xweş be. Mijarek din jî heye ew jî ev e; gelo bi hêzên ku naxwazin dewleta Kurdan hebe, hêza ku Alaya Kurdistanê û Sirûda Ey Reqîb qebûl neke, ma dikare di Kongreya Neteweyî de cih bigire."

Di sala 2013'an de ji çar alîyên Kurdistanê nûnerên 70 partî û rêxistinan li Hewlêrê ji bo Kongreya Netewî ya Kurd civîyan lê ji ber şert û mercên navxwe û navdewletî  wê demê negihiştibûn encamekî. Niha careke din sîyasetmedarên Kurd hewil didin ku Kongreya Neteweyî ya Kurd bicivîne û Kurd bi hêzeke neteweyî destkeftîyên xwe biparêzin. Li gorî ragihandina sîyasetmedarên Kurd tê plankirin ku di serê meha Kanûnê de şandeyeke ji bakûr serdana başûr bike.

 Çavkanî: K24