Teşkîlatê PAKî yê Batmanî bi Hawayêko serkewte kongreya xo ya diyîne viraşt.

Serekîya dîwanê Kongere hetê M.Emin Ekincîyî ra ame îdarekerdene.

Kongreya diyîne ya Teşkîlatê PAKî yê Batmanî bi şêhîdanê Kurdistanî rê hurmet û bi marşê Netewî ‘Ey Reqîb’ dest pêkerd.

Serekê Şûbeyê Batmanî Azîz Ozdemir şi vera meymanan û va; "Na kongreya ma ya diyîne bi şîarê ‘Çareserîya heme meseleyan de rayîrê dîyalogî û bi rayîr û raybazê demokratîk û sîyasî bibo.’ virazîyena’’.

Qalîkerdişê Aziz Özdemirî ra dima, Dîwanî waşt wa Endamê Komîteya Îdarekarî yê Merkezî yê (KBN) PAKî Hanifi Turan qiseykerdişêk biko.

Endamê Komîteya Îdarekarî yê Merkezî (KBN) Hanifi Turanî va:

‘’Ez nameyê Serekê partîya ma birêz Mustafa Özçelikî ser o û nameyê Meclîsa Partîya ma ser o vana, şima xeyr ameyî û şima rê sipas kena. Ez heme delege, endam û îdarekaranê  Teşkîlatê Batmanî yê PAKî rê sipas kena ke kongreya xo ya diyîne virazenê.

Ewro welatê ma her çar perçeyan de zî prosesêko hesas ra vîyareno.  Ma nê prosesê hessasî de kongreya xo ya diyîne virazenê. Na kongreya ma ya Batmanî nîşanê îradeyê dewamîya dewaya azadîya Kurdistanî dano.

Dewleta Tirkîya hetêk ra Vakurê Kurdistanî de şerê xo domnena, qeyûman tayînê beledîyeyan kena,  derheqê hezaran kesan de  tehqîqatan akena, hepis û tewqîfkerdiş û îşkence dewam kene. Dewleta Tirkîya hetêk ra zî Vaşûrê Kurdistanî rê hêriş kena û uca de qereqolan virazena. Dewleta Tirkîya kena ke hêrişê Rojavayê Kurdistanî zî biko û dest rono statuyêka sîyasî ya ucayî ser o.

Belê dost û hevalê ercîyayî,

PAK, Partiya Fedakaranê Kurdistanî ya. Nê panc serrîyo ke PAK bi îmkananê endam, îdarekar û dostane xo bi hawayêko fedakarî  xebatanê xo kena. PAK xo sey dewamîya têkoşînê azadîya Kurdistanî yê 200 serre  vînena . PAK vana ‘Azadî Seba Kurdistanî, Azadî Kurdistanî rê’….Dadgeha Qanûnê Bingehînî ya Tirkîya derheqê PAKî de dewaya qefilnayîşî akerda; vana ‘nameyê xo û programê xo  bibedilnê’. PAK zî pawitişê xo de bi aşkere va, ‘Ma nameyê zî, programê xo zî nêbedilnenê. Wa Dewleta Tirkiya Qanûnê Bingehînî û qanûnanê xo  bibedilno’. PAKî reya ewilî Dadgeha Qanûnê Bingehînî de pawitişê xo bi Kurdî kerdo….Ma sey PAKî roja ewilî ra vanê: Êyê ke eşkenê bibê yewe wa bibê yewe; êyê ke eşkenê bibê yew wa desteg bide yewbînan û îtîfaqan bikerê; êyê ke eşkenê wa mîyanê xo de dîyalogê xo aver biberê. Wa yewbînan rê dişmenetî nêkerê.’’

Xeylê îdarekarê  PAKî ê Mêrdîî û Amedî, Serekê Komela Ahmedê Xanî M.Sait Temel, Temsîlkarê Partîya Yewîya Kurdistanî-Surîye, Endamê KDP Vakur yê Batmanî û xeylê sîyasetmedar û ronşvîrî beşdarê Kongre bîyê.

Aziz Özdemir newe ra sey Serekê Teşkîlatê PAKî yê Batmanî  ame weçînayîş. Mehmet Nurî Canpolat , Ahmet Öztekin, Mehmet Tahir Bilik, Süleyman İzgi, Hamdullah Toprak, Osman Zinnur Erçin zî sey endamê Teşkîlatê Batmanî ameyî weçînayîş. Vasfi Özdemir, Hava Özdemir û Aydın Bozan  zî sey andamê hetkar yê îdarekarî amey weçînayîş.

Kongre bi hawayêko serkewte qedîya.