Berdevkê Navenda Peywendiyên Dîplomatîk a TEV-DEMê Kemal Akîf dibêje li gor yasyayên heyî di çarçoveya berfirekirina rêveberiya bakur û rojhilatê Sûriyê de, ENKSê jî dikare tevlî rêveberiya nû bibe.

 

Kemal Akîf daxuyakirin ku ne wek merc lê wek helwest, divê ENKSê helwesta xwe li hember rewşa Efrînê zelal bike û ji nav Itîlafê vekişe, daku yekrêziya hêz û aliyên Kurdî li nav Rojavayê Kurdistanê bê pêkanîn.

 

Akîf herwiha anî ziman ku amadekariyên lidarxistina Kongreya Neteweyî ya Kurdî li ser asta Rojavayê Kurdistanê tên kirin, û got: “Deriyê wan ji tevahiya aliyan re vekirî ye.”

 

Ji aliyê din ve Bi beşdariya nûnerên ENKSê duh yekşemê (14.10.2018) li paytexta Erebistana Siûdiyê civîna Desteya Danûstankar a Opozisyona Sûriyê dest pê kir û têde rêkevtina Idlibê û avakirina komîteya destûrî ya Sûriyê hatin gotubêjkirin.

 

Biryar e di 16ê vê mehê de jî, her li bajarê Riyad a paytexta Siûdiyê, civîna taybet a berbijarên opozisyonê yên komîteya destûrî dest pê bike, ku dê careke din nûnerên ENKSê têde beşdar bibin.