TEVGER, PAK, PDK-BAKUR, PÊLKURD, PSK, Amed de derheqê ENFALî de pîya beyanat day

TEVGER, PAK, PDK-BAKUR, PÊLKURD, PSK, roja 14.04.2021 de Cemîyetê Rojnamegeran yê Amedî de derheqê jenosîdê ENFALî de pîya beyanat day.

Destpêkê kombîyayîşê çapemenî de vervatoxê Çapemenî yê PAKî Hanifi Turanî wesîleya dardebîyayîşê qiseykerdişêko kilm kerd. Xalid Begê Cibrî, Yusuf Zîya Beg û hevalanê înan de qiseykerdişêko kilm kerd û ê yad kerdî. Hanifi Turanî venga Dewleta Tirkîya da ke wa cayê mezelê înan û mezelê Şêx Seîd, Seyîd Riza û hevalanê înan bêrê aşkere kerdene.

Bade zî nameyê 5 partî û hereketan ser o ENFALî mesûlê TEGERî Yusuf Aydinî beyanatê ortaxî wend.

No zî beyanatê pîya yê 5 partî û hereketanê Kurdistanî yê derheqê ENFALî de yo:

''Jenosîdê Enfalî dewamê jenosîdê ke miletê kurd ser o bîyê yo

Dewleta Iraqî ya kolonyalîste ya wehşî, mabênê serranê 1983 û 1989 de vera şarê Başûrê Kurdistanî, bi nameyê ENFALî jenosîdêk kerd.

Enfal de qasê 182.000 kesê ke mîyan de qijî, pîlî, cinî, pîrikî û mêrikê sivîlî yê Başûrê Kurdistan ameyî qetil kerdene.

Komkiştişê Feylîyan, Barzan, Enfal û Helepçe, xelqaya dewamîya jenosîdê Miletê Kurd bî û nê jenosîdî hema zî Kurdistan de dewam kenê.

Seddam Huseyîn û ardimkerdoxê ey nameyê nê jenosîdo ke Quranî ra Sûreya Enfalî ra nameyê xo girewto, panabî ”Enfal”. Maneya Enfalî ”xenîmetê şerê vera kafiran” o. Belê rast o, Seddam Huseyîn tena Kurdistanîtalan nêkerd, camêrdê ke destê înan çek gêno pêro kiştî, bi des hezaran cinîyê kurdî ver bi çolanê ereban mecbûrî koçber bîy, sey ”xenîmetê şerî” dest ronîya înan ser, înan rê destdergî amey kerdene û tayê înan sûkanê dewletan de sey kole ameyê rotiş. Ewro hema zî herêmanê ereban de gorê komkiştişê kurdan vejyenê orte.

Îşaretê qirkerdişê kurdan, gama ke kurdê feyli bîyê qurbanê siyasetê Enfalî ame dayene û serra 1983 de de, gama ke tepişyayîş û kişyayîşê camêrdanê barzanîyan de bewlî bibi. Rejîmê Baasî kampanê zoremili de, 10 serrî ra hetanî 70 serrî, 8000 camêrdê barzanîyan êsîr girewtî û berdî çolanê Başûrê Iraqî û pêro qetil kerdbî. Cinîyê înan Musul û Hewlêr de bi mecbûrî îqamet kerdbî.

Qetlîamanê pîlan ê ke tarîxê modern yê merdimayî şahid bîyo, qetlîamê Enfalî yo. Mabênê hîrê serranê 1986-1989 de zî Seddam Huseyînî nê hêrişî û qetlîamê wehşî, şerê Îranî de zî kerd.

Enfal de pa miletê kurd, şarê asurî, keldanî û turkmenî zî ameyê qetilkerdiş. Netîceyê qetlîamê Enfalî de 182.000 kurdistanijî ameyî qetil kerdene, 4000 dewê Başûrê Kurdistanî ameyî vengkerdene, bajarê sey Qeladiza û Seydsadiqî de tena yew ban zî sexlem nêmend, 3000 camî, 2000 dibistanî, 300 nêweşxaneyî, awanîyê weşîye û 27 dêrî talan kerdî. Milyonêk kurdistanî ca û wareyê xo caverday, kewtê çol û koyan. Elektrîk, telefon, rayîrî pêro felc bîy, hêgayî û ziraetî bewayîr mendî, heywanê înan nêmendî.

Emerîka, Ewropa, Yewîya Sowyetan , dewletê misilmanî, cîranê Kurdistanî, dewletê dagirkerî, heme bêveng mendî, çimê xo pêrcay û xo kerdî kerr.

Key ke sehezaran kurdî semedê xelisnayîşê ganê xo, sînorê Bakur û Rojhilatê Kurdistanî ke destê Dewleta Tirkîya û Îranî de yê, mehsûr mendê û ê dîmenî televizyonan ser ra resay keyeyanê emerîka û ewropayijan, badê dezgeyê mîyneteweyî vengê xo vet.

Belê, Enfal tena jenosîdê vera şarê Kurdistanî nêbi, no jenosîd hetêk ra zî jenosîdêk vera merdimayî zî bi.

Labelê, ne jenosîdê verînî, ne yê Enfalî, ne zî yê peyênî ke Kurdan rê bîyê, nêeşkayê vernîya rayîrê dewaya azadîya Kurdistanî bigîrê

Doman û tornê qurbanîyanê Jenosîdê Enfalî ewro Başûrê Kurdistanî, Herêma Federe ke pêro dewletê dinya qebûl kenê, destvistê. Heto bîn ra ê doman û tornê qurbanîyanê Jenosîdê Enfalî, Referandûmê Xoserîye yo ke roja 25ê êlûla 2017î de virazîyabi, bi netîceyê %93 xoserîye rê va; ‘e/ya’.

Dewleta Federe ya Başûrê Kurdistanî, ewro tena semedê kurdan ney, semedê asûrî, keldanî, turkmen, ereb, ermenî û heme şarê ke Kurdistan de cuyenê; semedê misilman, êzîdî, xiristîyan, elewî, ehlî heq, şiî, sûnî û heme dîn û mezheban bîya stargehêk.

Parlamentoya Herêma Kurdistanî roja 14ê nîsane, semedê yadkerdişê Enfalî, sey roja yadkerdişê Enfalî îlan kerda. Kurdî tena roja 14ê nîsane de ney, do her wext nê qirkerdişî bîyarê vîrê xo û xo vîrî ra nêkerê.

Ma venga Neteweyê Yewbîyayî Yewîya Ewropa û dezgeyanê sivîl û raya pêroyî ya dinya danê ke, ENFALî bi hawayêko fermî qebûl û şermezar bikê.

Ma venga Neteweyê Yewbîyayî, Yewîya Ewropa û dezgeyanê sivîl û raya pêroyî ya dinya danê ke wa hetkarî bidê şarê Kurdistanî ke miletê Kurd zî sey heme miletanê dinya bibo dewlet û bieşko erdanê xo ser de îdareyê welatê xo û îdareyê komelê xo bike.

Ma venga Parlamento, Serekî, Hukmat û Hêzê Pêşmerge yê Başûrê Kurdistanî danê ke, yewrêzîya mîyanê keyeyê xo xurt bikê, destvistişanê xo rê wayîr vejîyê, dezgeyanê dewletbîyayîşî bikerê yew, aver berê, yê neweyan awan bikê û azadî, demokrasî, edaletê komelî yê Kurdistanî aver û hîra bikê.

Ma venga heme kurd û kurdistanîyanê dinya danê ke wa hurmet nîşanê Serwerîya Rayberîya Herêma Kurdistanî bikê û wayîrê heme destvistişanê neteweyî û niştimanî vejîyê.

Ma şehîdanê Enfalî û hemû şehîdanê Kurdistanî bi hurmet yad kenê û êyê ke nê jenosîdî kerdê, şermezar kenê.

14.04.2021

TEVGER, PAK, PDK-BAKUR, PÊLKURD, PSK''