Tevî zext, guvaş û astengiyên hêzên emnî yên Îranê, hemwelatiyên Rojhilatê Kurdistanê agirê Newrozê vêxistin û bi alayên Kurdistanê Newroz pîroz kirin.

Wek salên berê li gundê Nê yê Merîwanê ahengek bi boneya Newrozê birêve çû û hemwelatiyan bi cil û bergên Kurdî û alaya Kurdistanê cihê xwe di ahengê de girtin.

Hêzên emnî yên Îranê rojek berî Newrozê li herêmê hatibûn belavkirin û tedbîrên emnî hatin zêdekirin.

Li gor zanyariyan alozî di navbera niştecihên wî gundê Merîwanê û hêzên emnî rû da di encamê de 3 endamên hêzên emnî yên Îranê birîndar bûn.

Her li gor zanyariyan elektrîk û hêla înternetê jî li ser gund hat qûtkirin, lêbelê ne ew yek û ne jî guvaşên hêzên emnî li pêş kombûna xelkê nebûn asteng ku Newrozê pîroz nekin û xelkê bi coşeke mezin Newroz pîroz kirin.

Li piraniya gund û bajarokên Rojhilatê Kurdistanê, wek; Bokan, Pîranşar, Seqiz, Bane û çendîn cihên din gefa hêzên emnî li ser xelkê bû ku Newrozê pîroz nekin û hincet jî ew bû ku rêgiriyê li belavbûna Coronayê bikin.

Lê tevî hemû hewlên astengkirinê jî hemwelatiyên Rojhilatê Kurdistanê Newroz bi coşeke mezin pîroz kirin.