Goreyê Peymana Ottawaya ke Tirkîya qebul kera heta 2022î a do pêro mayînan pakî bikera. Tewr peyên Şirnex de di omanan mayinî ra dinyaya xo bedilnaye.

Deweka Yekmalî ya qezaya Qilebanî ya Şirnexî de domananê bi nameyê Yusuf Ata (14) û Caner Sak (16) vizêr saete 15.00 de wexto ke baxçeyê qereqolî de kay kerdêne pay na mayinî ser û dinyaya xo bedilnaye. Leşkeran verî  bimojnê keye cenazayî berdî morgê nêweşxaneyî.

Goreyê Peymana Ottawaya ke Tirkîya qebul kera heta 2022î a do pêro mayînan pakî bikera. La hema zî mayinan ra semed hewmelatîyê sivîlî mirenê.

 Kurdîstan de xeylêk kesî heta nika mayinan ra semed merdî.Goreyê raporê Baroyê Amedî Kurdîstan de 180 kesî mayinan yan zî hacetanê leşkerîyan ê neteqîyayeyan ra semed merdî yan zî seqet bîyî.

Goreyê raporê Baroyî nê 180 kesan ra 60 kesî doman bîyî û tewr zaf zî Amed, Çewlîg, Dêrsim, Sêrt, Şirnex û Wan de mayinî teqenê. Êyê ke teqayîşê mayinan ra xelisîyenî zî hetê psîkolojîkî ra benê nêweş û dewleta nê nêweşan tedawî nêkena.

goreyê raporê Komîteya Teqîbê Mayinanê Erdî (Landmine Monitor) 1999 de Tirkîya de nêzdîyê mîlyonêk mayinî binê erdî de yê. Depoyan de 3 mîlyon mayinî zî pabeyê îmha yê. Agirî, Erdexan, Êlih, Çewlîg, Bedlîs, Amed, Dîlok, Colemêrg, Hatay, Îdir, Qers, Mêrdîn, Sêrt, Riha, Şirnex, Dêrsim û Wan de 3 hezar û 174 waran de mayinî estê. 

Goreyê çimeyanê raporê Peymana Qedexeyê Mayinan a Tirkîya (29ê Adara 2013î):

-Sînoranê Tirkîya de qasê 906 hezar û 497 mayinî estê.

-Tirkîya de hûmara mayinanê binê erdî mîlyonêk û 3943 a.

-Tirkîya de dormeya dezgehan ê leşkerîyan de 97 hezar û 446 mayinî estê.

-Tirkîya de heta nika 25 hezar û 47 mayinî ameyî pakîkerdene.

-Nînan ra ber binê erdî de xeylêk roket, hawan û mayinî estê ke hûmara înan nêzanîyena.

Peymana Ottawa 1ê adara 1999î de kewte dewre. Tirkîya zî 2003 de na peymane qebul kerde û 1ê adara 2004î de viste dewre. Tirkîya qebul kerd ke heta 2014î mayinan wedarna û serra 2013î de heta 2020î wext waşt. 

Goreyê doneyanê Neteweyan ê Yewbîyayeyan serra 2010î de 97 sivîlî mayinan ra merdî ke nînan ra 26 kesî doman bîyî. 19 domanan wexto ke pê mayinî kay kerdêne dinyaya xo bedilnaye. Goreyê raporê Landmine Monitorî 2017 de Tirkîya de 42 kesan parçeyanê mendeyan ê mayinan ra zerar dî.