Jêderekî ji bajarê Efrînê ji K24ê re gotiye, çend roj in artêşa Tirkiyê û milîsên wê hejmarek malên welatiyan, dibistan û avahiya şaredariya gundê Cilbirê yê li navçeya Şêrewa ya Efrînê hildiweşînin û li cihê wan dîwarekî çîmento datînin.

Wî jêderî daye zanîn, heta niha bi zelalî nayê zanîn armanca avakirina wî dîwarî li navçeya Şêrewa çi ye û danîna dîwar ji gundê Cilbirê û ber aliyê rojavayê wî gundî berdewam e.

Li gor wî jêderî,  ew dîwar ji aliyekî ve gundên navçeya Şêrewa ji hev cuda dike û ji aliyekî din ve herêma Efrînê ji bakûrê Helebê cuda dike. Herwiha ew dîwar rê li pêş vegera koçberên Efrînê yên ku li navçeyên bakûrê Helebê dimînin jî, digire.