Keştîya ke macîrê ke waştênê şêrê Ewropa kiriştêne, roja pancşemeyî Tunus de cum bîye. Tewr tay 41 macîrî merdî û hema zaf kesî zî awe de vîndî yê.

Goreyê yewînanê asayîşî yê qeraxê Tunusî Safakes de keştîya ke macîrî kiriştêne cum bîy. Vervatoxê asayîşê qeraxê Sefakesî  Alî Ayarî da zanayîş  ke,  heta nika tirmê 41 kesan binê awe ra amey vetiş. 

Seba ke rewşa hewayî xirab o xebatê cigêrayîşan roja îne ame vindarnayene û ewro dewam kerd.

Goreyê Neteweyanê Yewbîyayeyan çeleyê 2021î ra nata Dengizê Sipî de  tewr tay 292 macîrî xeniqyayê .2020 de 1200 macîr merdbî.