Merkezê Xeberan- Şubeyê Amedî yê Komeleya Heqanê Merdiman (ÎHD) bîlançoya şîdetê vera cinîyan pare kerde.

Raporî de ame vatene ke şerê Sûrîye de nêzdîyê 5 hezar cinîyê êzidîyî hetê DAÎŞî ra ameyî esîrkerdene û aqibetê 3 hezar cinîyanê êzidîyan zî hema nênê zanayene. Raporî de dayîye zanayene ke Sûrîye de gorê komî yê cinîyan û domanan ameyî dîyene. Gore Raporê 2018î yê Têdûştîya Cînsîyetan ê Forumê Ekonomîkî yê Dinya Tirkîya mîyanê 149 welatan de 130. a. Raporî de ame vatene ke cinîyê tepişteyî hetê wezîfedaran ra şîdet vînenê. La derheqê wezîfedaran de tehqîqatî nênê akerdene.

Kurdîstanî de 54 Cinîyî Ameyî Qetilkerdene

Raporê Şîdetê Vera Cinîyan ê  ÎHDyî de ame parekerdene ke Kurdîstanî de 16 cinîyî xo kiştî û 54 cinîyî zî ameyî qetilkerdene. 13 cinîyî sey merde ameyî vînayene, 61 cinîyî birîndar bîyî û 9 cinîyî zî maruzê hêrişê cînsî bîyî. Raporî de ame vatene ke Riha de 8, Amedî de 7, Dîlokî de 6, Gumgumî de 5, Êlîhî de 4, Meletî de 4, Mêrdînî de 3, Îdirî de 1, Xerpêtî de 3, Dêrsimî de 3, Agirî de 3, Erzeromî de 2, Wanî de 1, Bêtlîsî de 1, Şirnexî de 1, Çewlîgî de 1, û Colemêrgî de 1 cinîyî bi temamî 54 cinîyî ameyî qetilkerdene. Nînan ra 29 cinîyî bi çekanê biadiran, 6 cinîyî bi çekanê tûjan, 2 cinîyî bi vêşnayîşî, cinîyêke bi fetisnayîşî, cinîyêke bi derbkerdişî ameyî qetilkerdene. Raporî de ame pare kerdene ke wareyê komelkî de 11 cinîyî bi çekanê biadiran, 2 cinîyî bi çekanê tûjan ameyî qetilkerdene û 6 cinîyî bi çekanê biadiran, 3 cinîyî bi çekanê tûjan, 9 cinîyî zî bi derbkerdişî birîndar bîyî. Raporî de ame vîrvistene ke Êlîhî de 1, Erzeromî de yew, Erzînganî de 2, Colemêrgî de 2, Dîlokî de 2, Meletî de 2, Amedî de 2, Erdexanî de 1 û Sêrtî de zî 1 cinîyî merdî û mergê înan ser o şikî estî.