Tepişteyo nêweş o 83 serre Mehmet Emîn Ozkan pê kelemçeyan  wedarîya nêweşxane.

Vizêr serê sibayî rewşa tepişteyê nêweşî Mehmet Emîn Ozkanî (Apê Dedo) bîy xirab. Eskeran destê Ozkanî kelemçe kerdî û bi no qayde neqlê Nêweşxaneyê Perwerdeyî û Cigêrayîşî yê Gazî Yaşargîlî yê Amedî. Dîmenanê nêweşxaneyî de dîyeno ke wextê ardişê Ozkanî de destê ci kelemçekerde yê, nêeşkeno payan ser o vindero.

Keyeyê Ozkanî seba ke nêweşxane de biewnê tira muracatê Serdozgerî û Îdareyê Zîndanî yê Amedî kerd.

Ozkan 25 serrî yo tepişte yo. Heta nila 5 rey krîzê qelbî derbaz kerd, 4 reyî anjîyo bîyo. Ozkan de nêweşîyê qelb, tansîyon, guatrî, helîyayîşê esteyan, xirabîya roqleyan estê.