Mehmud NÊŞITE

Ez hema şeş-hewt aşme bîya babîyê mi rehmet keno. Badê ke babîyê mi rehmet keno dadîya mi mi şit ra nêkena. Yeno mi vîr ez çar-panc sere bîya zî mi çijê dadîya xo litêne/antêne. Bêxîlafe hema zî tehmê şitê dadîya mi hayo ziwanê mi ser! 

Mergê babîyê mi ra dima ma çar tutî sêwir mendê û ma kewtê milê dadîya xo. La dayîka mi seba ke ma weye bikero nêva na şew a no roj o xebitîya, xebitîya û xebitîya!

Roj şîne kar û gureyê şarî kerdêne. O wext şarî verê çeman de serê hênîyan de kincê xo şutêne. Şarê Farqînî hîna zaf zî “şîyêne Çemê Hesen Beg”î de yan zî serê “Kanîya Derge” de dere kerdêne, kincê xo şutêne. Dadîya mi roj nê cayan de derê şarî kerdêne, kincê şarî şutêne. Hênîyanê mehleyan ra şarî rê awe antêne. Şewe zî şîyêne arêyê şarî de çeltîko kuwaye moxil kerdêne, birinc û kapekî yewbînan ra cêra kerdêne. Hetanî mîyanê şewe ancax ameyêne keye. Seba weyekerdişê ma, roj kar û gureyê keyeyan de bî, şewe zî arêyan de bî! 

Şewanê winasî de seba ke ez çijê aye biancî hetanî ke ameyêne mi a pawitêne. Mi mîyanê cila xo de û binê lehêfî de xo nata-weta  qelebinêne. Zaf rey waya mi hewna şîne la ez nêkewtêne ra. Mi pira bêrî şitê aye kerdêne mi bawer nêkerdêne ke a bêro û ez çijê aye bikî xo fek û şitê aye biancî. A şewa tarî de çimê mi timî berî ser, goşê mi zî vengê linganê aye ser bi. La gama ke aye ameyne keyfan ra a şewa tarî mi rê bîyêne roşnê rojî. Wexto ke mi teq û reqîya ameyîşê aye şinawitêne mi vatêne qey dinya pêro bîya yê min! Keyfan ra ez tavilê weriştêne û mi lihêf xo ser o eştêne û ez doşekî ser de roniştêne. Hetanî nika zî mi keyfweşîyêka winasî hema hîs nêkerdo. Helbet nika zî çîyê ke ez tira zaf keyf û zewq bigêrî estê. La o keyf û zewqo ke mi ameyîşê aye ra girewtêne mi hema keyf û zewqêko winsî nêdîyo.

Aye ke kewtêne zere hetanî ke kincê xo yê kapekinî vetêne çimê mi aye ra nêvisîyêne. Mi sebir nêkerdêne ke aye bêro bikewo binê cila ma û çijo ke monêne kuwareyê hingimênî biko mîyonê lewanê mi û o şito tehmijin qirrika mi ra şêro war. Aye bîyêne yew mîlçike, ez zî bîyêne leyîrê ci. Leyîrê ke maya înan înan rê werd bîyaro dest û lingê înan senî kewtêne têmîyan yê mi zî o tewir dest û lingê mi kewtêne têmîyan, fekê mi ra gilêze ameyne. Wexto ke lehefî daritêne we û kewtêne binê ci, êdî o ca mi rê bîyêne cenet, mi rê bîyêne halînê mîlçikan.

 Aye kurmê mi zanêne. Senî ke kewtêne binê cile mi verare kerdêne û huşkahuşk mi xo wa piştêne. Mi zî her dî destanê xo dergê pistinê aye kerdêne û o çije yo ke monêne kuwarê hingimênî mi kerdêne mîyanê destanê xo û mi şidênêne, şidênêne. Pira mi şidênêne pencikê mi çijê aye ra şîyêne. Wexto ke mi çije antêne fekê mi bîyêne pir û mi qirrika xoya barî ra qurt-qurt kerdêne war. Vengê ê qurt-qurtî hema zî hayo goşê mi de.

Tayê şewan mi rê lorî kerdêne. Vengê aye zî sey aye weşik û rindek bi. Ge-ge lorîyan tadayêne deyîran ser. Mi o wext deyîranê aye ra fehm nêkerdêne, la mi hesrê çimanê aye ra fehm kerdêne ke aye deyîranê hêsirî, feqîrî û belengazîya xo vana. Aye hem vatêne hem zî bermayêne. La mi xemê bermayîş û hesiranê aye nêkerdêne. Derd û xemê mi şit bi şitê aye bi.

Şewa ke winî/o tewir bermayêne tehmê şitê aye vurîyêne, bîyêne solin! Çunke hesrê çimanê aye lêrî bîyêne û alişka mi ra şîyêne kewtêne mîyanê lewanê min. A game şitê aye û hesirê aye kewtêne têmîyan û qirika mi ra hetanî pîzê mi şîyêne. Hetanî ke ez xo ra şîyêne mi qurt-qurt o şito solin qurtnayêne. Ez nêzana gelo tehmê ê şitî çira hende weş bi! Mabên ra hewtay serrî ra vişêr wext zî şîyo hema tehmê yê şitê solinî fekê mi ra nêşîyo!       

Ewro zî gama ke behsê dayîkan beno, şitê maya min o solin yeno çimanê mi ver. Belkî tay kesê bînî zî qasî mi şitê dadîya xo werdo la ez texmîn nêkena ke tu kes qasî mi ê şitî ra hes kerdo!

Badê ke ez fehmberê xo bîya, mi bê tehmê yê şitî yew efsûn/sêhrêkê bînî yê şitê dayîke kifş kerd. Şitê dayîke tena pîzê însanan mird nêkeno. Şitê dayîkan de sêhrê mîletê xo esto. Ruhê yew mîletî bi wasitaya şitê dayîke neqlê neslo newe beno. Ewro gonîya ke damaranê însanan ra herikîyena û gandarî dana însanan hêzê xo şitê dayika xo ra gêna! No şit tena hêzê gandarî nêdano gonîya ma; eynî wext de a gonîya ke însanî bi mîletê ey wa girêdana zî hêzê xo şitê dayîkan ra gêna.

Şitê dayîkanê ma kurdan, xorînîya tarîxê mîletê ma ra yeno! Tede tehmê welatê ma tehmê kulturê ma tehmê ziwanê ma esto. Şitê dayîkanê ma kurdan de rence esta, zehmetî esta! Şitê dayîkanê ma de amênê mewcudîyetê mîletê ma, amênê mewcudîyetê însanetîya ma esto! Şitê dayîkanê ma de şan, şeref û namusê mîletê ma esto! Şitê dayîkanê ma de amênê ziwanê ma esto…

Eke ma layîqê nê şitî nêbê û eke ma şan, şeref û namusê mîletê xo muhafeze nêkerê û eke ma bi ziwanê dayîka xo qisey nêkerê no şit, şitê dayîkanê ma beno xenimê ma!

Roja heme dayîkanê kurdan pîroz bo.

Yeni Özgür Politika