ÎHD û Komeleya Cigêrayîş û Barkerdişî ya Sehratî eşkera kerd ke hîrê serran de Wan de 160 macîran dinyaya xo bedilnaye.

Komeleya Heqanê Merdiman(ÎHD) û Komeleya Cigêrayîş û Barkerdişî yê Sehratî yê wanî derheqê macîranê ke sînorê Wan-Îranî de dinyaya xo bedilnaye de eşkerayîye daye.

Eşkerayîya ke banê ÎHDyî de ameye dayene de Endamê Heyetê Rayberdişî yê ÎHDyî Hamdî Bahyanî qisey kerd. Bahyanî ard ziwan ke dewlete semedê vergirewtişê merganê macîran berpirsîyar a û vat rîyê polîtîkayanê îqtîdarî ra macîr û multecîyî mexdur benê. Bayhanî rayîrê multecî û macîran sey rayîrê mergî name kerd û vat goreyê raporê înan ê 3 serran o ke warê înan de ameyo kerdene  49 kesî misîyel bîyî, 68 kesî Gola Wanî de xeniqîyayî, 42 kesî qezayanê trafîkî merdî, kesêkî bi çeke dinyaya xo bedilnaye û pêro pîya 160 multecîyan diyaya xo bedilnaye.

Beyhanî vat: Ganî sere de pawitoxê heqê merdiman heme komel vera multecîyan hîsgêr bo nê waştişî rêz kerdî:

Wa Pêkerdişê Peyserqebulkerdişî bêro betalkerdene ke multecîyan ser o bazarîye nêro kerdene.

Wa hêrişê vera multecîyan bêrê vindarneyene û seba înan şertê cuya merdimî bêrê caardene.

Wa qanûnê Qedexeyê peyser îadekerdişî bêro caardene û kam ke ê binpay keno wa bêro muhakemekerdene.

Wa merkezê peyserşawitişî de heq huqûqê macîran esas bêro girewtene.

Wa dêsê ke sînorê Wan-Îranî de yenê viraştene bêrê vindarneyene.

Wa Pêkerdişê Cenevre yê 1951î bêro bedilnayene û Tirkîya de statû bidîyo macîran.

Wa Ewropa û welatê dinya beranê xo multecîya rê abikerê, wa heqê serbest gêrayîş û cakerdişî yê multecîyan bêro qebulkerdene.