Aktîvîstê xoza Haydar Çetînkaya ard ziwan ke herêmê Dêrsimî şarî rê qedexe yê la seydwanan rê serbest ê. Çetînkayayî seydwanîye sey ''cînayetî'' pênase kerde û vat: ''Têkoşînê şarî eşkeno verê seydwanîye bigêro.''

Pê bira Komîsyonê Seydwanîye yê Dêrsimî herêmê Kutudere, Dokuz Kayalar, Arpanos, Herêma Hîran, Gelîya Înî û Herêma Çemişgezekî zî tede 8 herêmî sey warê seydwanîye ameyî îlankerdene. Xeylêk seydwanî şaristananê cîya-cîyayan ra ameyî Dêrsim ke heywanan qir bikerê.

Tewr peyên 6ê teşrîna peyêne de 10 seyîdwanê îspanyolî ameyî Dêrsim. Komîsyonê Seydwanîye yê Merkezî pare kerd ke lîsteya seydwanîye de pezkovîyî çin ê la 24-29ê teşrîna peyêne de seydwanan Gelîya Înî ya Mazgêrdî de pezkovîyî kiştî.

Aktîvîstê xoza Haydar Çetînkayayî derheqê têgêrayîşê seydwanan ê Dêrsimî de Ajansê Mezopotamya rê qisey kerd. 

Çetînkayayî îfade kerd ke pê bira Komîsyonê Seydwanîye her serre şaristan de heywanî kişîyenê û vat: ''Tay seydwanî zî bi hawayêkê qeçaxî Dêrsim de heywanan kişenê. Şaristan de yew mekanîzma çin a ke seydwanîye kontrol bikera.  Nika seba kişîyayîşê 120 heywanan destûr dîyayo. Ganî şar vera ney nêrazîbîyayîşê xo bimojno. Seydwanî vanê 'Dewlete destûr dayo ma, belgeyê ma estê.' No zî şermê ma yo. Seydwanîye spor nîya cînayet a. Wa her kes naye bizano. ''

Çetînkayayî pare kerd ke hişmendîya AKP-MHPyî do qetî seydwanîye qedexe mekera û vat: ''Ma pê madenan gêrîyayî binê ablûqa. Dêrsim hetê floraya xo ya heywan û nebatan ra zaf zengîn a. La yeno waştene ke na flora bêra çinkerdene. Eke xozaya ma bêra qirkerdene nê heywanî se benê? Eke verê ney nêro girewtene Dêrsim do bibo warê seydwanîye. Ganî ma vera ney nêrazîbîyayîşê xo bimojnê.''