Wendekaranê cinîyan ê Zanîngehê Munzurî da eşnawitene ke akademîsyenêkê Beşê Perwerdeyê Domanan wendekarî tacîz kerdî û gerreyê ey kerd. Platformê Cinîyan ê Dêrsimî paştî daye wendekaran.

Wendekaranê cinîyan ê Zanîngehê Munzurî Serdozgerîya Komare ya Dêrsimî rê gerre kerd ke akademîsyenêkê Beşê Perwerdeyê Domanan wendekarî tacîz kerdî. Platformê Cinîyan ê Dêrsimî derheqê îdîayan de Meydanê Seyîd Rizayî de eşkerayîyêke daye.

Nameyê platformî ser o Bişenge Asula eşkerayîye wende.  Asula vist vîrî ke çend rojî verî zî 45 wendekaranê Beşê Edebîyatî vat ke ê raştê tacîzê mamostayê xo ameyê. Asula vat: ''Derheqê Zanîngehê Munzurî de her roje îdîayê neweyî benê rojdem. Na rewşe ra verî rektorîya zanîngehî mesuldar a. Çunke ganî rektorîye derheqê nê îdîayan de tehqîqat  bikera û tedbîran bigêra. Ma sey cinîyanê nê şaristanî do tim nê îdîayan teqîb bikerê. Wayê ma yê wendekarê zanîngehî têna nîyê.''