Navenda Nûçeyan - Di nav 45 kesên hatibûn binçavkirin de endamên Dayikên Aştîyê, nivÎskar, weşanger, sîyasetmedar hebûn. Piştî 4 rojên binçavkirinê duh ew derxistin pêşberî dadger. Dadger ev 14 kes bi gotina "Endamtîya rêxistinê" tewqîf kirin: Dayika Aştîyê Makbule Ozbek, weşanger Mehmet Gungormuş (Azad Zal), Fesih Balbey, Mehmet Cahit Ay, Emrullah Zumrut, Adil Ercan, Mustafa Alimterin, Tevfik Kaçar, Yildiz Damla, Enver Çelik, Erdal Bayram, Fedai Akar, Jîyan Taş, Leyla Bagirtir û Mehmet Cahit Şik

Di dema serdegirtina mal û sazîyan de bi ser Weşanxaneya J&J de jî girtibûn û polîsan dest danîbû ser hin pirtûkên J&J'yê jî. Piştî lêgerînê weşanger û niviskar Azad Zal jî hatibû binçavkirin.

Azad Zal kî ye?

Weşanên J&J yek ji weşanxaneya naskirî ya kurdan e. Heta niha bi sedan pirtûk weşandine ku tenê di sala 2019'an de 66 pirtûk gihandibûn ber destên xwendevanan. Azad Zal bi navê xwe yê di nasnameyê de Mehmet Gungormuş xwedî û edîtorê weşanxaneyê ye Zal, ligel weşangerî ew bi xwe jî dinivîse û heta niha çend pirtûkên wî derketine. 

Zal di sala 1972'yan de li Sûra Amedê hatîye dinê. Di nav Komeleya Nivîskarên Kurd, Enstîtuya Kurdî ya Amedê de cih girtîye. Herî dawî di nav Tora Ziman û Çanda Kurdî de jî cih girtibû. Bi navê "Teşî", "Rêwî", "Zimanê Kurdî" û "Sûzê û Hirç" çar pirtûkên wî heta niha derketine. Zal di heman demê de edîtorîya kovara Psychology Kurdî jî dikir.