Merkezê Xeberan - Teşkîlatê Weşîye yê Dinya (WHO) Rojavayê Kurdistanî rê ardimê tibbî erşawit.

Temsîlkarê Teşkîlatê Weşîye yê Dinya (WHO) yê Sûriye twitterê so ser ra aşkere kerd ke, ewro 30 ton ardimê tibbî resayo bajarê Qamişlo û no neqlo yewin o.

Vajîyeno ke no ardim de lazimtîyê tibbî esto û semedê xizmetê şarê Qamişlo bêro xebitnayîş.

Çen rojî verî Teşkîlatê Weşîye yê Dinya (WHO) vatbi ma 20 ton ardimê tibbî erşawito Qamişlo, la Rayberîya Xoser zî aşkere kerdbî ke, no ardim nêresayo destê înan û kewto destê rêjîmê Sûriye.

Verî zî Hemserekê Heyetê Weşîye ya Cizîre Dr. Menal Mihemedî vatbi ke, heta nika Teşkîlatê Weşîye yê Dinya (WHO) înan rê ardim nêkerdo û tena Herêma Kurdistanî înan rê ardim erşawito.