Xwendekarên ku ev demeke ji ber nebûna beşê navxweyî û zêdebûna kirêya xaniyan li parkan radizin û çalakiyan dikin şeva borî 6ê Cotmeha 2021ê li Meydana Taksîmê ya Stenbolê bi betaniyan meşiyan.

Xwendekarên ku navê “Bêwaran” li xwe kirine û bi slogana “cihê me nîne” li kolanan nerazîbûna xwe pêşan didin li navçeya Beyoglu ya Stenbolê li 5 kolanan meşiyan û piştre li Meydana Taksîmê daxuyaniyek dan. 

Xwendekaran daxwazên xwe anîn ziman û gotin: “Em li her derê ne û bo mafê xwe yê cih jî çalak in. Lê li şûna guhê xwe bidin me, polîs êrîş dike û hevalên me desteser dikin. Emê çalakiyên xwe berdewam bikin, em cihê manê dixwazin.”

Xwendekaran diyar kirin ku bi armanca piştgiriyê ev çalakî saz kirine û bi betaniyên xwe dimeşin û ji welatiyên li qadê daxwaz kirin ku piştgiriyê bidin çalakiyên wan.

Herî dawî Serokkomarê Tirkiyê Recep Tayyip Erdogan ji ber çalakiyên wan ew wek "qaşo xwendekar" bi nav kiribûn.

Li Tirkiye û Bakurê Kurdistanê her sal di meha Îlonê de perwerdeya zanîngehan destpê dike. Bi destpêkirina perwerdeya rûbirû li gelek bajarên Tirkiye û Bakurê Kurdistanê gelek xwendekaran cihê manê peyda nekirin û li beramber krîza manê nerazîbûnên xwe nîşan didin. Xwendekarên cihê manê peyda nekirine ji bo çareserkirina pirsgirêkê “Tevgera Barinamiyoruz” (Bêwaran) ava kirin. Xwendekar gazina nebûna cih ji saziyên girêdayî zanîngehan û kirêya giran a malên taybet dikin.