Serekê Baroyê Amedî Tahîr Elçî serrgêra 6. ya qirkerdişê xo de ame yadkerdene. Avûkatî ver bi noqtaya qirkerdişê Elçîyî pê cubeyanê xo şîyî û înan waştişê xo yê edaletî reyna ard ziwan.

Avûkat û Serekê Baroyê Amedî Tahîr Elçî 28ê teşrîna peyêne ya 2015î de verê Mînaraya Çarlinge ya Sûrî de amebi qetilkerdene.

Serrgêra 6. ya qirkerdişî de avûkatî verê Edlîyeya Amedî de ameyî yewca û ver bi noqtaya qirkerdişê Elçîyî pê cubeyanê xo şîyî.

Avûkatan rayraşîyayîş de pankarta bi nuşteyê 'Ma to vîr a nêkerê' kirişte û sloganê 'Tahîr Elçî bêmerg o' vat. Verê Mînaraya Çarlinge de saete 10.53 de wextê qirkerdişê Elçîyî de deqayêk rêz ame girewtene.

Serekê Baroyê Amedî Nîhat Erenî dima qisey kerd û vat: ''Rolê kamî nê qirkerdişî de estê seba ke bêrê muhakemekerdene ma do xîret bikerê. Ma soz danê Tahîr Elçîyî, rayaumûmîya Kurdîstanî û Tirkîya.''

Dima Turkane Elçî qisey kerd û vat: ''Ewro ma reyna kewtê mîyanê cigêrayîşê edaletî. Verê ma de dêsê betonînî estê. Ma 6 serrî yo seba edaletî qîrenê. Kam ma eşnaweno? Hema zî vengê guleyî goşanê ma de yo ke peynîya aramîya ma arda.''