Komîteya Rayberîya ya Merkezî (KBN) yê PAKî (Partîya Azadîya Kurdistanî) roja 28.05.2022î de kombîyayîşê xo yê mengane ya îstîsnayî, bi hawayêkê rîbirî viraşt.

KBN yê PAKî şerdê Kurdistanî û Tirkîya û bîyayîşê dinya ser o vindert û goreyê qerarê ke Meclîsa Partîye ya PAKî de girewtbî, xerîteya xebata xo ya demê ameyeyî bewlî kerd.

Dewleta Tirkîya sîyasetê xo yê zafhetî ya dişmenetîya Kurdan ser o dewam kena. No sîyaset êdî resayo na merhele ke, bi bahaneyê ‘’asayîşê şarî’’, konserê hunermendê Kurd yenê qedexe kerdene. Onca çend hunermendê Tirk û Lazî zî para xo ê qedexeyan ra girewt.

Qedexe kerdişê konserê hunermendanê Kurd, eslê xo de netîceyê vîr û hîs û hişmendîya nîjadperest û sowen o. Qedexe kerdişê konserê hunermendanê Tirk û Laz zî, nîşanê bêtehamulîya fikrê cîya yo, nîşanê çîne hesibanayîşê azadî û demokrasî yo.

KBN yî PAKî veng dano her kesê ke bi hîsanê merdimayîye têgêrenê ke, wa vera nê qedexe û tedayîya nîjadperest û zordarî vindarnê.

Dewleta Tirkîya mîyanê prosesêkê neweyî yê bedilyayîşê zereyî ra vîyarena. No proseso ke Tirkîyî mîyanê ci ra vîyarena de, armanc û sîyasetê hempar yê Tifaqê Cimhur û Tifaqê Miletî pîya ‘’Pawitişê bingehê Dewleta Tirkîye’’ yo. Tifaqê Cimhur wazeno bi Sîstemê Serekîye ke sîstemêko Tekkesî yo Totalîter o, paradîgmaya ‘’Yew welat, yew milet, yew dewlete, yew ale’’ bica biko; Tifaqê Milet zî wazeno bi Sîstemê Parlamenterîye yo Xurtkerdî, paradîgmaya ‘’Yew welat, yew milet, yew dewlete, yew ale’’ bica biko. Armanc û bernameyê Tifaqê Cimhurî de zî, yê Tifaqê Miletî zî, vindarnayîşê şerî, caardişê demokrasî, azadî û edaletêko mende çîn o. Heto bîn ra armanc û bernameyê Tifaqê Cimhurî de zî, yê Tifaqê Miletî de zî, ma caverde çareserîya meseleyê Kurd û Kurdistanî ; qebûlkerdişê nasnameyê Kurdî, perwerdeyîya bi ziwanê Kurdkî û musnayîşê ziwanî zî çin o.

Seba na rastîye, KBN yê PAKî vano, semedê bedilnayîşê na rewşa miletê Kurd a 99 serrîyo ke nêameyo bedilnayîş, gama yewine na ya ke, potansîyelê tewr hîra yê Kurdan , waştişê xo yê acîlan ser o bibê yew û sey Terefê Kurdî têbigêrê.

KBN yê PAKî, muhîmîyêka pîle dano înîsîyatîfo ke PAK, PSK, TDK-TEVGERî semedê awankerdişê Terefê Kurdî dest pêkerdo û semedo ke wa no însîyatîf bireso armancê xo do xebatanê xo bi sebir bidomno. Heto bîn ra KBN yê PAKî, bale anceno ser neyî ke, gereke Terefê Kurdî, bi heme hetanê demokrat, azadîwaştox, edalet waştoxanê Tirkîya reyde zî, semedê bernameyêkê hemparî yê waştişanê acîl yê miletê Kurd zî mîyan de,hemkarîyêka hîraye awan biko.

KBN yê PAKî, hetêk ra muhîmîyêke dano xebata awan kerdişê Terefê Kurdî; la heto bîn ra zî, semedê awankerdişê tifaqêkê stratejîk yê neteweyî, demokratîk, Kurdistanî zî do xebatanê xo yê ke hetanî ewro ameyê kerdene, dewam biko.

KBN yê PAKî, hêrîşê Dewleta Tirkîya yê ser Başûr û Rojavayê Kurdistanî û onca şerê PKKyî û Dewleta Tirkîya yê ser erdanê Başûrê Kurdistanî ser o zî vindert.

Dewleta Tirkîya, nika qismêkê erdê Rojava û Başûrê Kurdistanî îşgal kerda. La pê ney qayîl nêbîya; wazena her di hetan ra zî, bi namê ‘’Korîdorê Asayîşî’’, bi xorînîya 30 KMyî, bi hawayêko mende erdê Rojava û Başûrê Kurdistanî îşgal kerdo. Tîya de armancê esasî yê Dewleta Tirkîya, Rojavayê Kurdistanî de astengkerdişê statuyêka sîyasî, cografîk, neteweyeyî yo û onca bedilnayîşê demografîya ucayî yo. Armancêko bîn yê Dewleta Tirkîya zî, tehdît û çîne kerdişê statuya federe ya Başûrê Kurdistanî yo, astengkerdişê na statuya ke esta û astengkerdişê xurt kerdişê dezgehanê dewletbîyayîşî yo.

Dewleta Tirkîya wazena şerê Rusya-Ûkrayna û muracatê Îsveç û Fînlandîya yê semedê endamtîya NATOyî, semedê astengkerdişê heqanê Kurdan sey firsendêk bişuxulyno. Dewleta Tirkîya, hetêk ra Bakur, Başûr û Rojavayê Kurdistanî de dişmenetîya Kurdan kena, hetêk ra zî kena ke vernîya destvistişê heqanê neteweyî, statuyêka neteweyî, sîyasî bigîra.

KBN yê PAKî bale anceno ser nê sîyasetê Dewleta Tirkîya ya ser diimenetîya kurdan ameya awankerdene ûveng dano NATOyî û Netewê Yewbîyayî, ke vernîya nê armancê Tirkîya yê vera kurdan bigîro û goreyê hûqûqê mîyanneteweyî, goreyê peymananê mîyannetewî yê heqanê merdiman têbigêro.

Aşkereyo ke, PKK zî bi sîyaset û kerden û helwestê xo yê vera Başûrê Kurdistanî, estbîyayîş û qerar û serwerî û meşrûîyetê Parlamento, Serektî, Hikûmet û Hêzê Pêşmerge yê Herêma Kurdistanî nas nêkeno, qebûl nêkeno. Gereke PKK , Başûrê Kurdistanî de sey dewleteka federe bivîno û hurmet nîşanê serwerî, dezgeh û yasayanê ucayî bido, goreyê qeraranê ucayî hereket biko, şerê xo yê çekdarî Başûrê Kurdistanî ra dûrî bigîro.

KBN yê PAKî na bawerîye de yo ke, pawitişê destvistişanê Başûrê Kurdistanî, mesulîyetî û wazîfeyêko neteweyî û tarîxî yê heme partîyanê sîyasî yê Başûrê Kurdistanî û yê heme Kurdanê dinya yo. Çi heyf ke PDK, YNK û heme partîyê Başûrê Kurdistanî zî, ewro bi bêtifaqî, nakokî, problemanê mîyanê xo; Tirkîya û Îran û hêzanê bînan yê dorûverê xo rê Başûrê Kurdistanî de rayîr akenê. PDK, YNK û heme partîyê Başûrê Kurdistanî, gereke ca de meseleyanê xo yê zereyî çareser bikê; gereke sey dewletêka kurdan hereket bikerê; gereke heme hêzê pêşmerge, asayîş, îkdîsadî, dîplomasî û îdarî yê Başûrê Kurdistanî bibê yew û sey terefekê Kurdan bibê mixatabê Bexda û heme dewletanê herême û dinya.Rayberîya Herêma Kurdistanî gereke vera hêrîş û îşgalkerdişê Dewleta Tirkîya û Îranî razînêbîyayîşê xo nîşan bidê, gereke warê mîyannetewî de bi dîplomasîyêa xurte, biwazê ke wa nê hêrîşî bêrê vindarnayîş û heme dewletî hurmet nîşanê Serwerîya Herêma Federe ya Başûrê Kurdistanî bidê.

Rojavayê Kurdistanî de, hetêk ra her çiwas xebatê tifaqê Kurd û Kurd de zaf zehmetî, astengî, midaxale estbê zî; goreyê ma çîyo tewr hewl, rast û netewî no yo ke, ser esasanê Mitabaqatê Dihokî, Rojavayê Kurdistanî de rayberîyêka wertaxe ya eskerî, îkdîsadî, sîyasî, sîyasî, dîplomatîk bêra ronayene.

Rojhilatê Kurdistanî de zî Rejîmê Îslamî yê Îranî tu heqê şarê ma qebûl nêkeno, îdam û zilm û neheqî dewam kenî. Vera Rejîmê Îslamî yê Îranî reyna şarê Rojhilatê Kurdistanî û şarê Îranî çalakîyanê protestoyî virazenî. Nê çalakîyê protestoyî semedê başkerdişê ekonomî bê zî, eslê xo de protestoyê vera zordarî û zilm û neheqîyan ê. Ma desteg danê şarê Rojhilatê Kurdistanî. Kilîdê destpêkî yê akerdişê berê azadî, tifaq û hemkarîya mabeynê partîyanê neteweyî, niştimanî yê Rojhilatê Kurdistanî yo. Kurdî mîyanê tîfaqî de bê do bieşkê zêdêr firsendê ke bêrê verê berê înan ra feydê bigîrê û do hetkarîya hêzê mîyannetewî hîna zêdêr bo.

Kombîyayîşê KBN yê PAKî de, heme xebatê rêxistinî, aborî, sîyasî, çapemenî û dîplomasî yê Kurdistanî, Tirkîya, Ewropa, ronîyayîşê PAKî ra hetanî ewro, bi hîrayî ser o ame vindertiş û reyna bi bawerî tesbît bi ke, pa heme kêmasî û zehmetîyan zî, PAK Bakurê Kurdistanî de hêzo esasî yo azadîwaşt, neteweyî, demokrat, Kurdistanî yo.

KBN yê PAKî, semedê organîzekerdişê lazimtîyêka partîyeka xurtê a Bakurê Kurdistanî, veng dano heme kadro, ciwan û cinîyanê neteweyî, demokrat, azadîwaşt yê Bakurê Kurdistanî, Tirkîya û Ewropa û vano, wayîrê PAKî rê vejîyêne, PAK yê şima yo, bênê ma pîya PAK pîlêr û xurtêr bikê.

02.06.2022

Buroya Çapemenî û Têkilîye ya PAKî