Parlametoyê Ewropa de bi wesîleya serrgêra destpêkerdişê şerê Sûrîye persnameyêk ame hazikerdene. Vernîyaz de Tirkîya sey hêzêka îşxalkere amey namekerdene û ame waştene ke wa cade herra ke îşxal kerde ra vejîyo.

Parlametoyê Ewropa de bi wesîleya serrgêra destpêkerdişê şerê Sûrîye hetê Demokratê Xiristîyan, Renewo Sosyalîst û Demokrat, Refomkar û Muhafazakar grûbêke ra persnameyo hempar ame dayene ke do rojanê verê ma de bêro munaqeşekerdene û vîjnayene.

Persname de derheqê Tirkîya de wina ame vatene: ''Tirîya 2016î ra nata vakurê Sûrîye ke bitaybetî kurdî tede yê îşxal kerd û qanûnê mîyanneteweyî binpay kerdî. Menga teşrîna verêne ya 2019î de ra nata zî herêmê ke hetê Hêzanê Sûrîyeya Demokratîke (QSD)yî ra yenê kontrolkerdene îşxal kerdî. Badê nayî welatanê Yewîya Ewropa Tirkîya rê rotişê çeke vindarna.Tirkîya leşkerê bipereyî yê surîyeyîjî şawitê Yukari Karabag. Dewleta tirke Efrîno ke îşxal kerd de cayê bimbarekî û gorê êzidîyan rijnayî.''

Persname de ame waştene wa hesabê sûcanê şerî yê Sûrîye bêrê persayene û ardîya ziwane ke Sûrîye de rewşa xirab a û rixmê xîretkerdişê wezîfedaro taybetê yê Neteweyanê Yewbîyayeyan Geir O. Pedersenî avêrşîyayîşêk nêbi.

Heme binpaykerdişê heqan û şîdetî ke yenê kerdene ameyî şermezarkerdene û wina ame vatene: ''Wa Rusya, Îran û Hîzbulah zî teberê hêzê haştîye de heme hêzê xo peyser biancê. Îran û Rusya paştî danê rejîmê Sûrîye û şarê sîvîlî rê zext kenê. Tirkîya zî wa leşkeranê xo vakurê Sûrîye ra bianco. Tirkîya cayê ke îşxal kerdî sûrîyeyijanê kurdan tepişena erzanê zîndananê Tirkîya. No binpaykerdişê pêkerdişê Cenevre yo. No pakkerdişo etnikî yê vera kurdan o. Mudaxaleyê Tirkîya mucadeleyê vera DAÎŞî zî keno zehîf.''

Nameyê wekîlanê ke vernîyaz hazir kerd wina yê:

Michael Gahler, Lukas Mandl, Antonio López-Istúriz White, Isabel Wiseler-Lima, Tom Vandenkendelaere, David Lega, Adam Jarubas, Janina Ochojska, Marek Belka, Isabel Santos, Tonino Picula, Nathalie Loiseau, Barry Andrews, Olivier Chastel, Klemen Grošelj, Bernard Guetta, Urmas Paet, María Soraya Rodríguez Ramos, Michal Šimečka, Nicolae Ştefănuță, Ramona Strugariu, Hilde Vautmans, Ryszard Antoni Legutko, Anna Fotyga, Karol Karski, Adam Bielan, Ryszard Czarnecki, Angel Dzhambazki, Assita Kanko, Elżbieta Rafalska, Jadwiga Wiśniewska, Veronika Vrecionová, Bogdan Rzońca, Ruža Tomašić, Hermann Tertsch, Elżbieta Kruk, Nikolaj Villumsen, Fabio Massimo Castaldo.