Merkezê tepiştişê multecîyan ê Korinthî yê Yunanistanî de multecîyo kurd Îbarahîm Ergunî semedê protestokerdişê şertanê tepiştişî xo kişt. Cenazaya Ergunî do bîşawîyo memleketê ci Mûş.

Merkezê tepiştişê multecîyan ê Korinthî yê Yunanistanî de multecîyo kurd Îbarahîm Ergunî semedê protestokerdişê şertanê tepiştişê multecîyan xo kişt.

Îbrahîm Ergun (24) 17 mengî yo ke Merkezê tepiştişê  multecîyan ê Korinthî ameyêne tepiştene. Roniştişê 28ê adare de qerarê dewamê tepiştişê Ergunî amebi dayene. Dîya zanayene ke multecîyê kurdî semedê protestokerdişê nê qerarî xo kişt.

Rojnameger Çagdaş Kaplanî da pêhesnayene badê otopsî do cenazaya Ergunî bişawîyo memleketê ci Muş.

Badê nê qewimîyayîşî merkezê tepiştişî de çalakîyanê protestoyî dest pêkerd.Tay cayê merkezî ameyî vêşnayene.

Merkezê Kulturê Kurdan ê Atina û grûbê vera nîjadperestîye do siba saete 18:00 de verê parlamentoyê Yunanistanî de eşkerayîya çapemenîye bidê û polîtîkya multecîyan a hukmatî şermezar bikerê.