Serokomarê Ûkraynayê Volodimir Zelensky, îro Înê 25ê Sibatê piştî ku hêzên Rûsî gihîştin paytext Kîevê bang Serokê Rûsyayê Vladimîr Pûtîn kir û got: “Ji bo mirin bên rawestandin em li dor maseya gotûbêjê rûnin.”

Zelensky di vîdyo peyama ku li ser Telegramê belav kiriye de, herwiha bang li welatiyên welatên Ewropayê jî dike ku bi çalakiyên protestoyî yên dijî hikûmetên xwe bibin alîkar ku gavên aktîf bavêjin.

Li aliyê din dîmenên teqînan ji Kîevê têne belavkirin û welatiyên li Kîevê jî di metroyan û stargehên ewle de kom bûne.

CNNê jî ragihandiye ku Zelensky niha derbasî stargehekê bûye û ji wir karê xwe didomîne.

Zelenskyî li ser hesabê xwe yê Twitterê bersiv daye daxwaza pêwendiyê ya Serokwezîrê Îtalya Mario Draghi û gotiye, ji ber şer û pevçûnên li deverên Çernihiv, Gostomel û Melitopolê gelek mirov mirine û ji ber şerê berdewam nekariye ligel wî biaxive.